Hahu husi loron 10-11 fulan Setembru 2014, Secretarido Permanente ba Conferencia Ministros Justiça CPLP (CMJCPLP) nian, organiza sorumutu ba Komisaun Servisu nian iha area Kombate Trafiku Humano nomos area Kombate Korupsaun iha Transaksaun Komersial Internasionais. Sorumutu ida ne’e, hala’o iha sidade Lisboa, Portugal.

Timor Leste hanesan mos Estado membru CPLP, nebe’e dadaun ne’e lidera hela Presidensia CPLP nian, liu husi Ministeriu Justisa, haruka funsionariu nain 2 hodi partisipa iha sorumutu refere, hanesan komitmentu bot ida ba kontribuisaun dezenvolve komunidade CPLP nian.

Sorumutu husi Komisaun rua ne’e, ho objetivu principal atu aktualiza informasaun (progresu) nomos diskuti hamutuk hodi buka solusaun ba dezafius ne’ebe iha husi kada nasaun membru, lku-liu ba iha implementasaun Planu Asaun Lisboa, ne’ebe foin aprova husi Ministru Justisa CPLP nian, iha Lisboa, loron 29-30 Maiu 2013 liu ba.

Sr. Nelinho Vital, reprezentante MJ Timor Leste iha Komisaun Trabalhu ba Kombate Trafiku Humano nian, informa katak: “sorumutu ida ne’e sai importante tebes ba Timor Leste tamba atu sukat ita nia asaun ba kombate krime trafiku humanu ne’e to’o iha nebe ona? Maske aktu trafiku humanu ne’e existe ona hanesan aktu krime nian tuir Kodigu Penal, maibe ita sei persiza nafatin atu halo asaun prevensaun nomos proteksaun ba vitima husi trafiku humano. Tamba ida ne’e, la kleur tan MJ sei aprezenta ba Konselhu Ministru proposta lei ida konaba kombate trafiku humano, hanesan kumprimisu bot husi Governo Timor Leste”.

Diskusaun ida ne’e sai interese liu tan, wainhira Timor Leste aprezenta nia progresu ba implementasaun Planu Asaun Lisboa ne’e, hanesan kriminaliza mos (tuir Kodigu penal art.166) hahalok fa’an orgaun/parte balun husi ema nia isin lolon ba ema seluk, asaun ida ne’ebe que nasaun membru sira seluk seidauk hala’o. Aleinde ne’e, koalia mos konaba protesaun vitima nian, Timor Leste mostra katak, kuaze iha teritoriu laran ita iha ona Polisia VPU nomos ajensia sira seluk, ne’ebe prontu atu atende, hatutan Sr. Nelinho.

Sorumutu ida ne’e remata ho asina akta hamutuk nomos sei deside konaba relatoriu kada grupu nian, ne’ebe sei aprezenta ba Ministru Justisa sira, iha CMJCPLP tinan 2015, iha Timor Leste.
Tuir planu, iha loron sexta, 12 Setembru, Secretariado Permanente CMJCPLP organiza mos workshop internasional ida iha Campus Justisa, Lisboa, konaba kombate trafiku humano. Ba okaziaun ida ne’e, reprezentante MJ Timor Leste, Sr. Nelinho Vital, hetan mos oportunidade hanesan orador.

Mize-DNAJL