Vise Ministru Justisa, Ivo Valente representa Ministru Justisa, dirije reuniaun ho Autór Judisíariu hodi debate kona-ba atu harii komisaun Protesaun ba Testamuña, bazeia ba dekretu Lei Nú. 2/2009 iha sala Reuniaun Ministériu Justisa loron 17 fulan Jullu 2014.

Iha enkontru ne’e Diretór Diresaun Nasionál Direitus Umanus no Sidadania, Ministériu Justisa, Celito Cardoso halo apresentasaun hanesan tuir mai: “ Sei harii Komisaun ba Programa Espesiál Seguransa, ho dependénsia direta ba Ministru Justisa, ne’ebé iha responsabilidade hodi hatuur no asegura atu programa espesiál seguransa bele la’o ho di’ak.
Komisaun ba Programa Espesiál Seguransa iha prezidente no sekretáriu ida ne’ebé Ministru Justisa maka nomeia, Majistradu Judisiál no Majistradu ida hosi Ministériu Públiku, ne’ebé Konsellu Superiór da Magistratura no Konsellu Superiór do Minsitériu Públiku maka hatudu, reprezentante ida ne’ebé Sekretaria Estadu Seguransa maka nomeia, ne’ebe hatudu hosi Sekretáriu Estadu ne’e rasik, reprezentante ida hosi Provedór ba Direitus Humanus no Justisa, ne’ebé hatudu liuhosi nia desizaun Komisaun ba Programa Espesiál Seguransa sei foti tuir votu maioria simples no prezidente maka iha votu kualidade.

Membru hosi Komisaun ba Programa Espesiál Seguransa hetan nomeasaun ba períodu tinan tolu, no ida ne’e bele renova tuir períodu tempu hanesan to’o renovasaun ba daruak nian ramata.”
Hafoin halo diskusaun ba programa ne’e, husi forum fo fiar ba Diretór DNDHC, Celito Cardoso Provizoriamente sai hanesan xefia ba komisaun hodi halo minutas ka pontu importante husi reuniaun ne’e. Pontu importante sira ne’ebé hetan husi reuniaun ne’e mak hanesan tuir mai;

1. Tenke halo uluk estudu ida ne’ebé klean husi lei Protesaun ba Testamuña atu hodi identifika saida mak komisaun atu halo durante mandatu tinan tolu nia laran.

2. Presiza halo estudu komparativu ida ba Indonezia (Komisi Perlindungan Saksi dan Korban), atu hare hodi sai nu’udar referensia ba Timor-Leste atu implementa lei Protesaun ba Testamuña.
3. Presiza iha regulamentu ba knar servisu komisaun nian, inklui mós hodi asegura segredu ba Testamuña nian.

Partisipa iha enkontru ne’e Directór DNDHC-Ministériu Justisa, Celito Cardoso, Adjuntu Provedór ba Direitus Humanus no Justisa (PDHJ), Silveiro Pinto Batista, Diretór Nasional Direitus Humanus PDHJ, Valerio M. Ximenes, Defensor Públku Jerál, Sergio Hornai, Defensór Públiku, Sergio Quintas, Prokuradóra distritál Dili, Ivonia Guterres, Representa Juiz Tribunál Rekursu, Zulmira da Silva,Represnta KNDL, Teresa Maria Freitas, Representa DNAJL, Armando Maia, no Representa sekretaria Estadu Seguransa, Claudio F.P. Gusmão.
Tuir planu, enkontru ba daruak sei hala’o iha loron 1 fulan Agostu tinan 2014, iha sala reuniaun Ministériu Justisa.

João Maupelo da Costa
Ofisiál Relasaun Públika no Divulgasa