Diretór Jerál Ministériu Justisa, Señór Francisco Cárceres hola parte iha serimónia eresaun (harii) Parókia Lakluta sub-distritu Lakluta distritu Vikeke. Serimónia solene ne’e hala’o iha loron-13 fulan-Juñu 2014.

Molok sai hanesan parokia Lakluta, durante tinan tolu (3) nia laran hahú husi tinan 2011 to’o 2014, Parokia ne’e prepara-an liu husi Quase Paróquia (pré-parókia) no tinan ne’e realiza duni hodi sai hanesan parókia foun iha Dioseze Baucau.

Serimónia eresaun (harii) parókia ne’e hahú ho prosisaun estátua St. António hodi hale’u igreja liu husi ermida ida-idak suco haat (4) nian maka hanesan Suco Uma-Tolu, Suco Laline, Suco Ahic no Suco Dilor ne’ebé pertense ba Parókia Lacluta. Prosisaun hotu tiha kontinua ho halo tuir ukur no lisan ne’ebé sarani sira hala’o iha Lacluta hodi komemora loron St. António maka moradór sira marxa hale’u igreja dala tolu (tuir loloos dala hitu) hafoin hatama fila-fali estátua ba igreja laran no kontinua ho selebrasaun eukaristia santa (misa).

Amu Bispu Dioseze Baukau, D. Basílio do Nascimento iha omília hateten” istória uma-kreda nian iha rai Timor, Lacluta mós tama iha prosesu inísiu evanjelizasaun nian iha rai Timor, maibé liu tiha husi ida ne’e Lacluta nia naran lakon tiha, nune’e Lacluta oan sira hein momentu ida ne’e iha tinan naruk nia laran hanesan mós profeta Isaias fó sai kona-ba Mesias, ne’ebé ema Judeu sira hein iha tinan atus hitu (700) nia laran. Nune’e, ohin hanesan loron ne’ebé Lacluta oan sira hein durante tinan atus nia laran. Tanba ne’e ohin Lacluta sai parókia, lasignifika katak buat hotu para ona, maibé parókia ida ne’e atu ba oin liu tan, Lacluta oan sira maka tenke serbisu duni.”

Iha okaziaun ne’e Amu-Bispu mós husu apóiu ba Prezidente Parlamentu Nasionál atu tulun sarani Lacluta hodi sosa sinu foun ida ba Parókia Lacluta, nune’e mós halo orasaun ba matebian Sr. Ovídio de Jesus Amaral (Embaixadór Timor-Leste ba Vatikanu) hanesan Lacluta oan ida ne’ebé serbisu no kontribui maka’as ba prosesu konstrusaun igreja no salaun parokiál ninian to’o nia hakotu iis iha Vatikanu fulan hirak liu ba.

Iha selebrasaun misa ne’e, lé sai mós desizaun Amu-Bispu nian hodi harii Parókia Lacluta no nomeasaun Pároku tuir Lei Kanónika nian husi Chanceler Dioseze Baucau, Pe. António Gonçalves dos Santos Freitas no asinatura despaxu husi Amu-Bispu Baucau, D. Basílio do Nascimento hamutuk ho Pároku Viqueque, Pe. Dionísio Sarmento, Vigáriu Parokiál Viqueque, Pe. Pascoal, Katekista Parókia Lacluta, André Sarmento, Diretór Eskola Sekundária Katólika St. António Lacluta, Miguel da Costa no mós Pe. Abel Soares Alves hanesan Pároku dahuluk Parókia Lacluta nian.

Amu-Lulik lubuk ida maka akompaña Amu-Bispu iha selebrasaun eukaristia ne’e maka hanesan Vigáriu Jerál Dioseze Baucau Pe. Francisco Pinheiro, Chanceler Dioseze Baucau Pe. António Gonçalves dos Santos Freitas, Pároku Viqueque Pe. Dionísio Sarmento ho Vigáriu Parokiál Viqueque Pe. Pascoal, Pároku Ossú Pe. Evaristo, Pároku Iliomar Pe. Joaquim da Silva, Pastor Próprio Quaze Parókia Natarbora Pe. Benedictus Randung, Pároku Lacluta Pe. Abel Soares Alves no amu-lulik balun tan hamutuk sanulu resin-ida.

Hafoin misa, kontinua ho asina plaka Parókia Lacluta no husik manu pombu husi Amu-Bispu no Prezidente Parlamentu Nasionál no akompaña husi Diretór Jerál Ministériu Justisa, Amu-Lulik sira, Komandante PNTL Distritu Viqueque, bainaka sira seluk no mós sarani tomak.

Hotu tiha kontinua ho selebrasaun aniversáriu Amu-Bispu nian daneen nulu resin-haat (64º) no almosu hamutuk ho bainaka no sarani sira hotu.

Serimónia eresaun ne’e rasik hala’o ho entuziasmu teb-tebes husi sarani Lacluta oan sira, basá momentu ne’e istóriku no ksolok teb-tebes, tanba molok sai parókia hanesan ohin loron, Lacluta oan sira ne’ebé hela iha Lacluta no mós fatin seluk halo kontribuisaun rasik hodi halo konstrusaun igreja, rezidénsia amu-lulik nian no salaun parokiál. Mesmu nune’e, sarani balun sente triste tanba laiha jornalista ruma husi média elektrónika no mós média impresa husi nasionál ka distritu maka prezente hodi halo kobertura ba eventu istóriku ba sarani Lacluta oan sira.

Sai hanesan bainaka iha serimónia solene ne’e mak hanesan; Diretór Jerál Ministériu Justisa, Dr. Francisco Cárceres ne’ebé hanesan mós Lacluta oan, S.E. Prezidente Parlamentu Nasionál, Dr. Vicente Guterres, Komandante PNTL Distritu Viqueque, Superintendente Justinho Menezes, Diretór Edukasaun Distritu Viqueque, Emídio Amaral, Diretór Rejistu Sivil Distritu Viqueque Rogério da Costa no mós konvidadu seluk tan husi Sub-Distritu Ossú, Sub-Distritu Viqueque, Sub-Distritu Barique no Sub-Distritu Soibada hola parte iha serimónia eresaun (harii) Parókia Lacluta ho padroeiru St. António iha Sub-Distritu Lacluta, Distritu Viqueque, ne’ebé haketak-an husi Parókia Viqueque. (im*)