DILI-, Hanesan ita hotu hatene katak, iha loron 18 Fevereiru 2014, Ministeriu Justisa aprezenta ba Conselho de Ministros proposta Decrteo Lei konaba Polisia Sientifiku Investigasaun Kriminal (PCIC) nomos Proposta Lei ida konaba Organizasaun Investigasaun Kriminal (LOIC). Proposta Diploma 2 ne’e, hetan aprovasaun ona husi Conselho de Ministros. Hare ba nia natureza, Proposta LOIC ne’e kabe ba kompetensia Parlamentu Nasional (PN) ninian. Ho nune’e, proposta LOIC haruka ona ba PN atu halo diskusaun molok hetan aprovasaun hodi vale nudar Lei ida.
Hatutan ba ida ne’e, iha loron Sexta, 2 Maio 2014 , semana kotuk, PN liu husi Komisaun B, konvida Ministeriu Justisa atu ba halo aprezentasaun konaba proposta lei refere, tamba Ministeriu Justisa mak sai hanesan na’in ba proposta LOIC ne’e.

Iha aprezentasaun ne’ebe hala’o direitamente husi Sr. Dionísio Babo, Ministru Justisa nian ne’e, foka liu ba kontiudu husi proposta lei refere, hodi koalia konaba k’nar ka kompetensia husi orgaun polisia kriminal sira nian, hanesan : PNTL (SIK), PCIC, CAC no Servisu Migrasaun. Lei ida ne’e atu koalia konaba kompetensia ba halo investigasaun kriminal ne’ebe sei hala’o husi orgaun polisia kriminal 4 (hat) ne’e, ho baze delegasaun kompetensia husi Procurador Geral, hanesan na’in ba asaun krimi ninian. Krimi hirak ne’e define ona iha Ita nia Kodigu Penal no lei ida ne’e, mai atu hatúr tan deit konaba kompetensia husi kada instituisaun kriminal sira atu ba halo investigasaun.
Durante audensia ne’e mos, membru deputadu sira Komisaun B, haré katak, lei ida ne’e importante tebes, hodi bele reforsa ita nia sistema justisa, liu-liu iha parte investigasaun ninian.
Iha audensia ne’e, delegasaun husi Ministeriu Justisa nian ne’e mai husi ekipa lejislador DNAJL, Diretora CFJ no Asesor Juridiku nain 1. Tuir planu, Komisaun B-PN sei halo mos audensia publiku ho PNTL, Secretario de Estado Seguransa nomos parte relavante seluk tan, iha tempu badak ne’e nia laran.