SEKRETÁRIU Estadu Terras Propriedades (SETP) Jaime Xavier Lopes, iha loron 19 to’o loron 24 fulan-Abríl 2014 foin lalais ne’e partisipa iha Enkontru kona-ba estratéjiku no mekanizmu legál nian ne’ebé presiza atu harii Zona Ekonómika Espesiál iha Distritu Oe-Cusse.

Governu nia debate ida ne’e hala’o bainhira Primeiru-Ministru, Kay Rala Xanana Gusmão akompaña husi eis Primeiru-Ministru, Mari Alkatiri, no husi membru Governu sira seluk halo vizita traballu ba Oe-cusse, ne’bé sei implementa projetu-pilotu Zona Ekonómika Espesiál Merkadu (ZEESM) Timór-Leste nian.

Durante semana ida nia laran hahú hosi loron 19 to’o loron 25 fulan-Abríl, delegasaun ne’e mantein nafatin somutuk ho autoridade tradisionál, relijioza no distritál nian sira, inklui xefe suku, partidu polítiku sira, Parseru Internasionál sira, emprezáriu nasionál no lokál sira no hamutuk ho reprezentante sira husi sosiedade sivíl distritu Oe-Cusse nian hodi halo debate ba implementasaun ZEESM dahuluk nian.

Iha sorumutuk hirak ne’e maka hanesan halo análize ba projetu infraestrutura nian sira, hanesan konstrusaun aeroportu Oe-Cusse, konstrusaun estrada no ponte sira, no seluk-seluk tan, hanesan mós mekanizmu legál sira ne’ebé relasiona ba projetu hirak ne’e.

Sei hanoin katak Planu Estratéjiku Dezenvolvimentu (PED) nian 2012-2013 prevee kriasaun Korredór Dezenvolvimentu Rejionál no Zona Estratéjika Nasionál sira, no ba ida ne’e hakarak kria lejislasaun no regulamentasaun espesífika ne’ebé define insentivu fiskál sira no direitu alfandegáriu espesífiku ba Zona Ekonómika Espesiál sira, atu nune’e bele dada liután investimentu no estabelesimentu empreza nasionál no estranjeira sira.

Nune’e iha loron 23 fulan-Marsu 2014 liu-ba Xefe Governu ho ninia Membru sira hala’o mós dialogu aberta ho komunidade sira iha Portu Mahata, Oe-Cusse hodi husu hanoin komunidade sira nian kon-ba ZEESM ne’ebé sei realiza iha tempu badak.

Iha dialogu ne’ebé hetan partisipasaun Masimu hosi komunidade afetadu sira ne’e koalia liu kona-ba komunidade sira ne’ebé hela besik Estrada ninin sira, tanba sira nia uma ho hela fatin sei mudasai hodi haluan Estrada ne’ebé ho nia luan Metru 30.

Hafoin Dialogu ho Komuidade sira SETP Jaime Xavier Lopes ho MJ Deonisio da Costa Babo hala’o kedas enkontru ho Diretór Nasionál Terras Propreidade, Diretór Terras Propreidade Distritu Oe-cusse Tékniku sira hosi Nasionál inklui mós funsionáriu Terras Propriedade nian sira iha Edifisiu foun Terras Propriedade Oe-Cusse nian, hodi bele responde esjijenisa komunidade afetadu sira nian iha futuru.*