Dili, Iha loron Terça-Feira 25 Março 2014, husi Direcção Naçional de Assessor Jurídica e Legislação (DNAJL) Ministériu da Justisa (MJ) halo diskusaun ba esbosu Lei Mediasaun hamutuk ho ekipa lejislador husi International Cooperation Department (ICD) Ministériu Justisa (MJ) Japaun. Diskusaun ida ne’e rasik hetan mos partisipasaun husi instituisaun relevante sira seluk hanesan PDHJ inklui mos parseiru sira seluk husi NGO. Diskusaun ne’e hala’o iha Centro Formação Jurídica (CFJ) Caicoli-Dili.

Ekipa husi ICD-MJ Japaun ne’e, kompustu husi Assessor Jurídiku husi JICA nian Sr. Tetsuya Yamamoto ho Sr. Yobuko Noriko, Sr. Tsuji Yasuhiko (Professor husi ICD) no Professor Tsuneo NIKI husi Universidade Osaka, Japaun.

Ekipa rua ne’e hamosu diskusaun ne’ebé klean no naruk hodi hare liu kona ba esbosu Lei Mediasaun, ne’ebe jurista Timor oan sira iha DNAJL prepara ona ne’e. Diskusaun ne’e atu fó hanoin ba malu, liu-liu husi matenek nain Japaun nian konaba mediasaun ne’e rasik, ne’ebe ikus mai buka dalan atu hadia diak liu tan ba artigu no aliña balun iha nia konteudu ne’ebe ladaun iha relevante ho kondisaun Timor-Leste nian.

Rohan husi diskusaun ne’e, iha lia menon husi Director Interino Sr. Honorio Malgalhães hateten katak, diskusaun ida ne’e diak tebes, no bele aumenta tan kapasidade husi ekipa lejislador Ministériu da Justisa (MJ) iha area lejislasaun nian. Diskusaun ne’e-mos sai hanesan pasu importante tebes ba iha ordenamentu juridiku Timor Leste nian, atu nune’e bele minimiza problema iha sosiadade nia le’et, hodi nune’e atu garante esbosu Lei Mediasaun ba iha sosiadade no atu bele tranforma ema ida-ida nia hanoin buka dalan resolve problema bele liu husi dalan mediasaun.