Iha loron Quinta-Feira 20 Março 2014, Departamento Politica Legislação husi DNAJL organiza diskusaun tekniku ho Assosiasaun Advogados Timor Leste (AATL). Diskusaun refere kona ba Projeito Lei Estatuto de Ordem dos Advogados Timor Leste nian. Diskusaun tekniku legal ne’e hala’o iha sala renião MJ, Caicoli-Dili.

Antes diskusaun ne’e, husi Diretor DNAJL Sr. Nelinho Vital, ne’ebé asumi mos kargu hanesan Presidente de Conselho Gestão e Disciplina da Advocacia halo intervensaun badak hodi koalia kona ba objetivu husi diskusaun ne’e katak, hanesan pasu importante ida seitor justisa iha Timor Leste maka oin nusa Advogado hanesan defensor atu hamrik ho legalidade ida forte liu tan.

Tamba atu garante povu nia direitu hodi hetan lia los nomos hanesan dalan asesu ba justisa, advogado iha papel ida importante liu hotu. Tamba ida ne’e, iha ona hanoin diak ida ba hametin no kompleta liu tan ordenamentu juridiku Timor Leste nian. Aleinde ne’e, objetivu seluk husi diskusaun ne’e maka hakarak rona no hatene pozisaun husi AATL rasik kona ba Esbosu lei refere, atu nune’e bele haforsa liu tan jurista DNAJL sira nian konhesimentu konaba proejitu lei refere, molok apresenta ba Konselhu Ministru.

Durante diskusaun oras 3 nia laran ne’e, AATL ne’ebé reprezenta husi Dr. Pedro Camões (Presidente AATL), Dr. Manuel Tilman (Secretariu Jeral AATL), Dr. Timotiu no seluk tan ne’e, konsege duni hatan ba duvidas hirak ne’ebe hato’o husi jurista DNAJL nian, konaba substansia projeitu lei refere nomos husi parte legistika ninian.

Diskusaun ne’e, hare mos ba artigu spesifiku balun hanesan oin nusa atu garante advogado Timor oan sira nian existensia hodi fó asistensia legal ba povu iha tempu transitoriu tuir Lei no.11/2008 haruka, diskuti mos konaba strutura husi Ordem Advogado Timor Leste nian mai ne’e, inklui kestaun tekniku balun tan.

Husi parte rua, DNAJL no AATL, iha ona konkordansia ba malu, konaba oin nusa atu halais projeitu lei ne’e ba iha orgaun lejislativa sira hodi hetan aprovasaun. Tuir planu, iha tempu badak nia laran, parte 2 sei tur hamutuk fali hodi harmoniza idea sira seluk, halo tradusaun ba lian tetum, pois kontinua ba konsulta publiku, antes aprezenta ba Sr. Ministru Justisa atu hetan aprovasaun final.