SEKRETÁRIU Estadu Terras Propriedades (SETP) Jaime Xavier Lopes, iha loron 14 fulan-Marsu 2014 hala’o senseblizasaun ba komunidade sira iha Suku Maumeta Sub Distritu Bazartete, Distritu Liquisa, hodi ko’alia kona-ba Artigu 54, Konstituisaun RDTL nune’e mos lei Nu. 1/2003.

Saida maka durante ne’e ami halo no nia vaze legál ne’e saida, ho ida ne’e baze legál ne’ebé SETP uza hodi halo senseblizasaun maka hanesan, artigu 54 konstituisaun RDTL, lei Nú. 1/2003, dekretu lei, 19/2004 no dekretu Lei no 12/2005.

Jaime hateten, Lei Nu. 1/2003, hamosu hosi primeriu governu hodi koalia konaba sasan sira ne’ebé maka estadu portuges no estadu Indonesia ho nia komunidade sira hosik hela, tuir lei sai hanesan patrimoniu estadu, no rai sira nee nia na’in maka estadu.

Senseblizasaun ne’ebé hala’o iha Suku Maumeta Sub Distritu Bazartete Distritu Liquiça ne’e hetan partisipasaun Masimu hosi komunidade sira inklui mós ninia autoridade lokál, Komandante Eskuadra Bazartete, Administradór Sub Distritu no Administradór Distritu Liquisa.

Durante senseblizasaun, komunidade sira prekupa liu kona-ba rai ho uma estadu ne’ebé maka komunidade sira okupa la iha koinesementu hosi estadu hdoi ikus mai sira fa’an, nune’e mós komunidade sira ne’ebé hela besik tasi-ibun, tanba tuir lei area tasi-ibun hanesan dominio publiku estadu nian.

Hatan ba kestaun ne’e SETP hateten, ba komunidade sira ne’ebé maka hela iha tasi-ibun no moris iha ne’ebá lei fó-dalan ba sira atu hela hodi bele sai nain ba rai, maibé la’os ema sira ne’ebé maka foin ba okupa fatin iha horseik horbainruak.

“Ha’u husu ba Diretór distritu hodi halo notifikasaun ba komunidade sira ne’ebé maka uza rai no uma estadu hodi bele regularize sira nia okupasaun, nune’e ha’u husu mós ba komunidade sira ne’ebé maka uza propriedade estadu tenki ba rezistu iha Terras Propriedades hodi bele regulariza imi nia okupasaun, selae estadu konsidera illegal no sei hasai.” Dehan Jaime.

Iha biban ne’e administradór Distritu Liquiça, Domingos da Concieção dos Santos hateten, komunidade sira bele simu SETP ho laran luak tanba bele mai ho komunidade sira hodi fó informasaun ruma kona-ba problema raitanba rai maka bele fó moris ba ema idaidak.