SEKRETÁRIU Estadu Terras Propriedade (SETP) hamutuk ho Vise Ministru Justisa, iha loron Kinta, 7 fulan-Marsu, 2014 foin lalai ne’e hala’o enkontru ho Diretór hosi Kompaña Grupu Média Nasionál (GMN) inklui mós funsionáriu Ita Nia Rai ne’ebé iha tempu badak sei troka ho naran Sistema Nasionál de Kadastro iha Salaun enkontru DNTPSC.

Enkontru ne’ebé hetan partisipasaun hosi Vise MJ inklui mós Diretór Nasionál Terras Propriedades no Diretór Terras Propriedades distritais ne’e SETP Jaime Xavier Lopes hateten, funsináriu tomak nia hakarak, oinsa maka servisu ne’e bele la’o ba-oin, nune’e komunidade sira mós hein hela ekipa tékniku sira tub a halo levantamentu dadus ba sira nia rai.

Maibé servisu atu la’o ho di’ak no susesu funsionariu sira tenki kria servisu hamutk ne’ebé di’ak nune’e mós tenki fó laran ba malu kona-ba servisu, tanba tenki fó atendementu ne’ebé di’ak ba komunidade sira.

Tuir Sektretáriu Estadu, fulan-oin Governu liu hosi Sekrtaria Estadu Terras Propriedades sei entrega funsionariu ho tékniku sira hamutuk nain 172 ne’ebé maka durante ne’e eziste iha Projetu Ita Nia Rai ne’ebé maka harii hela hosi USAID ba iha kompaña Grupo Media Nasionál ne’ebé maka lidera hosi Jorege Serano.

“Ha’u husu ba funsionariu INR nian sira ne’ebé la kleur sei muda ba GMN atu labele halo hanesan sei iha governu, ho ida ne’e tenki servisu ho laran, selae kompaña sei hasai, tanba ne’e funsionariu sira tenki servisu tuir sistema nune’e mós tenki kumpri regra sira ne’ebé maka kompaña ne’e iha,” tenik Jaime.

Nia mós husu ba diretór distritu sira tenki buka oinsa atu identifika fatin sira ne’ebé maka bele para atu halo prosesu levantamentu dadus kadastrais, bainhira xefe suku ruma husu kona-ba baliza suku nian, informa ba sira dehan baliza suku ne’e baliza administrativu ho ida ne’e Administrasaun ESTATAL maka iha kompetensia.

Iha biban ne’e Vise Ministru Justisa Ivo Jorge Valente mós hateten, levantamentu dadus, la’ós foun, maibé buat ne’ebé maka uluk tékniku sira hala’o tiha ona.

“Loron-loron ema mai ko’alia kona-ba rai, ohin mós sira mai reklama kona-ba fatin balu ne’ebé maka estadu konsidera hanesan estadu nian, ha’u fiar Ita-boot sira ema hanesan ema ne’ebé esperensiál liuiha sistema kadastro, importante no urjensia saida maka ita halo ba asuntu rai, maibe tenki hatene benefisiu saida maka komunidade sira hetan,” dehan Ivo.

Nia mós husu ba funsionáriu sira atu fo sira nia apoiu ba iha kompaña ne’ebé maka sei halo levantamentu dadus kadastral nian iha futuru, bainhira funsionariu sira maka la fó apoiu kompaña sei la halo buat ida maske ho sistema sira ne’ebé maka foun.
Tuir Vise Ministru tuir-lolós projetu ne’e implementa iha 2013 tinan kotuk maibe tanba sei atraza iha parte balu maka foin implementa tinan ne’e.

Vise Ministru Justisa nian ne’e promete ba funsionáriu sira katak, hafoin projetu ne’e remata ninia mandatu iha tinan 6 oin-mai, funsionáriu sira ne’ebé servisu ho kompania sei fila hamutuk ho Ministériu Justisa.

Iha okaziaun ne’e Diretór Kompaña Grupo Media Nasionál (GMN) Jorge Serano hateten, ho laran luak nia parte simu funsionáriu nain 172 ne’ebé maka durante ne’e fó sira nia apoiu servisu iha Nasionál no mós iha distritu.

Hanesan diretór ba kompaña nia mós husu ba funsionariu sira ne’ebé maka atu servisu hamutuk ho nia tenki tau intrese nasionalizmu no tenki kumpri servisu ne’ebé maka iha tanba mesak Timoroan deit.

Na’in ba jornál Nasional Diariu ne’e hateten kompaña servisu hamutuk ho ekipa tékniku sira ne’e, hodi bele fó apoiu servisu ba malu hodi buat hotu bele lao ba-oin ho di’ak.

“Ha’u husu ba funsionáriu sira atu tuir regra sira kompaña ne’e nian, ho ida ne’e tenki kumpre oras servisu, tanba ita hotu mesak rai ne’e nia oan” nia hateten.*