Loures-Durante halo visita official iha Portugal, Ministru Justisa (MJ) Dr. Dionísio Babo aproveita mos tempu ne’ebé limitadu ne’e hodi halo visita trabalhu ba Eskola Polísia Judisiaria (EPJ) iha Loures, Portugal iha loron 5 Februari 2014 horas 18.00 lokraik. Dr. Dionísio ho nia delegasaun simu direitamente husi Diretora EPJ Dra. Carla Falua.

Iha ninian intervensaun, Dr. Dionísio aprezenta nia laran ksolok ba dedikasaun tomak ho profesionalismu ida ne’ebé kapas, hodi fó formasaun ba Timor-oan sira ne’ebé agora dadaun hanesan formanadus iha ne’eba. Hanesan ita hatene katak, ba dadaun ne’e,Timor-oan hamutuk nain 5 maka eskola hela iha EPJ iha parrte espesializada nian ba area toxicologia (droga).

Dra. Falua mos hato’o nia agredesimentu tamba sira nia eskola hetan vizita ofisial ida husi Governante Timor Leste nian, Dr. Dionísio Babo, Ministru Justisa. Nia informa katak; “ida ne’e hanesan onra bot ida ba EPJ ne’ebé ohin loron bele simu direitamente Sr. Minitsru Babo iha sira nian fatin”. Diretora EPJ mos aprezenta ba Sr. Ministru Babo konaba prosesu aprendizajem iha EPJ ne’e, inklui ba maluk Timor-oan nain 5 nian. “Sira nain 5 iha ne’e, iha vontade bót hakarak estuda no apreinde liu tan, liu-liu konaba toxicologia, maske iha obstaklu barak mak sira hasoru hanesan lingua Portuges. Aliende sira simu teoria, hanesan konseitu jeral, formasaun ba pratika mos sai hanesan faze ida importante tebes. Tamba ne’e, iha EPJ formasaun ne’e sei foka barak liu ba prátika”.

Molok atu hakotu ninia visita ne’e, Ministru Justisa ne’ebé akompanha husi Dra. Maria Natercia, Vice-Presidente Konselhu Magistartura Timor-Leste, Dr. Nelinho Vital, Direitor Jurídica no Legislasaun MJ no Dra. Patricia Coutinho, Assessora Jurídica MJ nian, hato’o hela lian menon ba formandus Timor-oan sira katak “tengki haka’as nafatin ba estuda, atu nune’e bele reforsa ita nia seitor justisa, liu-liu iha parte droga ninian”. Kestaun lingua la’os barreira bot ida, maibe oin nusa mak atu pratika konhesimentu lingua nian ne’e. (N/)