Gabinete Vise Ministru Justiça, Ivo Valente, simu representante sosiedade sivil / NGO Rede ba Rai Sra. Inez Noronha ho representante nai 3 akompanha iha gabinete Vise MJ, loron 11-02-2014. ( oras, 09.00 – 10.30 ). Enkontru ne hodi rona prosesu ba aprovasaun Lei titular ba rai, prosesu levantamentu kadastru nian, no disputas ba rai, solusaun no objectivu prinsipal husi politika ba Rai iha Futuru.

Kestaun lubuk ida nebe hetan explikasaun husi Vise Ministru, sai nudar mata dalan ba sosiedade sivil hodi hatene politika geral ba rai husi Estadu RDTL, entre assuntos sira esklarese katak Sertifikadu legal ba rai so bele hetan wainhira lei pakote ba rai 3 nebe iha Parlamentu nasional hetan aprovasaun.

Explika mos konaba kontinuasaun ba levantamentu kadastru possivelemte ba parselas foun 250 mill liu, nune rai bele identifikadu, hodi fasilita Estadu no komunidade rasik atu hare no hetan benefisu ba identifikasaun sira ne, hare mos valor rai nian, no hare ba utilizasaun ba rai iha futuru.

Molok enkontru ne remata / termina, Rede ba rai, entrega Livru rua ba Vise Ministru hodi hare nudar mata dalan , ka komparasaun sucessu no obstakulu ruma konaba implementasaun politika ba rai iha Timor - Leste, hare mos oinsa politika ba rai bele benefisia povu mukit.

Rede ba Rai, iha hanoin katak iha fulan Marsu, atu hasoru mos Sr.Sekretariu Estadu ba rai, hodi diskuti assunto hanesan no rona prespetika politika no teknika hodi solusiona ka redus konflitu ba rai iha Timor - Leste.