Lisbon-Ministru Justisa Timor-Leste, Dr. Dionísio Babo, iha loron Quinta, 5-2-2014, hala’o sorumutu bilateral ida ho nia homologu, Dra. Paula Texeira da Cruz, Ministra Justisa Portugal nian. Sorumutu ne’ebé hala’o durante horas ida nia laran hodi koalia liu konaba kooperasauun entre rai rua ne’e iha parte justisa nian.
Ministro Babo ne’ebé akompanha husi Vice Presidente Tribunal Recurso Timor Leste, Dra. Juiz Maria Natercia Gusmão nomos Presidente de Conselho Gestão e Advocacia Privada, Dr. Nelinho Vital hato’o no louva ba kooperasaun servisu diak ne’ebé durante ne’e hala’o ona. Aliende ida ne’e, entre Ministro Justisa nain rua ne’e hato’o ba malu konaba progresu balun ne’ebé hetan ona iha parte justisa nian, lala’ok sistema justisa iha rai rua nian. Tamba Timor Leste ho Portugal hanesan mos nasaun membru ba organizasaun CPLP, maka situasaun justisa iha komunidade ida ne’e sai mos atnsaun husi governante nain rua ne’e durante sira nia sorumutu.
Iha parte sorin seluk, Ministra Paula ne’ebé akompanha husi Sekretariu Estadu ba Justisa no Chefe Gabinete Ministra nian rasik, informa konaba disponibilidade husi parte

Portugal nian atu ajuda nafatin Timor Leste iha setor justisa ne’e.
Sorumutu ne’ebé hala’o iha edifisiu sentral Ministériu Justisa Portugal, iha Praça do Comércio ne’e, diskuti mos konaba parte teknika balun hanesan magistratura, servisu ou funsionamentu advokasia privada, servisu prizaun no reinsersaun sosial, mediasaun no arbitrajem hanesan dalan alternativu ba resolve problema nomos asuntu konaba reforma justisa.
Kestaun ida ne’ebé sai interesante tebes durante sorumutu ne’e maka koalia konaba reforma seitor jsutisa nian. Tamba Portugal no Timor Leste rasik, iha tempu dadaun ne’e hala’o hela reforma ba servisu justisa nian. Iha okaziaun ne’e, Governante nain rua troka ba malu sira nia esperiensia hodi lidera prosesu ne’e, progresu nomos obstaklu ne’ebé mosu durante reforma ne’e.
Atu konkretiza tiha hanoin no idea hirak ne’e, maka Ministru Justisa nain rua ne’e, sei asina hamutuk protokolu kooperasaun iha area justisa nian. Protokulu ida ne’e hanesan protokolu xapeu ou protokolu sumbrinha ne’ebé atu sai hanesan mahon ba kooperasaun espesifika sira iha area justisa nian tuir mai no tuir planu protokolu kooperasaun ne’e sei asina iha tempu badak nia laran. (N/).