Dili, UNPAZ, Vise Ministru ba Justiça Ivo Valente sai nudar orador ba Semináriu nebe halao husi Universidade Nasional da Paz (UNPAZ), partisipa mos Vise Reitor I Dr. Rosinho da Cruz, Vise Reitor II Dr. Januario R. da Silva, Director DNDHC Dr. Celito Cardoso, Dr. Miguel Fernandes (moderador), dekanus Fakuldade nian, Dosentes no ho estudantes Universitariu tomak husi UNPAZ ne, ohin 05 de Fevereiro 2014.

Hahu ho Lian mak-loke husi Magnifiku Vise Reitor, nebe agradese ba inisiativa no apoiu husi Ministeriu Justiça ba seminariu nee, husu atu estudantes Universitariu sira, akompanha no aprende husi experiencias sira ba interrese habelar informasaun noo matenek ba ita nia sidadaun sira.

Hafoin intervensaun husi Director Nasional direitus humanus Dr. Celito Cardoso nebe hahu informa konaba objetivu prinsipal ba ideia ka hanoin halao seminariu ne iha UNPAZ atu bele hetan kolaborasaun husi estudantes no fo inisiativa ida aktivu hodi assegura lei no ordem, iha Estado Direitu Demokratiku.

Vise Ministru Justiça Ivo Valente, nebe hahu nia palestra iha tuku 09:45 to tuku 11:00, koalia barak sobre konseitu lei nebe vigor iha Estadu Timor – Leste, liu-liu refere ba konseitu Direitu no Dever normas internasional nian nebe konsagra ona iha konstituisaun Republika Timor-Leste nian, Ivo Valente nebe nudar orador explika mos artigos por artigos husi lei inan nee, no fo exemplo konkretus / reais iha vida moris nudar sidadaun Timor oan, liu-liu nudar estudante nebe iha papel fundamental, atu assegura implementasaun normas ida nebe ekelibriu entre direitu noo dever nudar sidaduan Timor-Leste. Vise Ministru Ivo Valente, informa mos konaba experiencias sira nudar dosente ida iha UNPAZ, iha inisiu hahu loke universidade nee, komesa hamutuk ho Universidade UNDIL, muda ba iha igreja Hosana to mai iha fatin ida nee. Artikula mos Lei inan sira nia demanda ho lei oan sira ka projectu ba lei sira balun nebe sei iha Parlamento Nasional.

Tuir sesaun seluk maka husu / pergunta no hatan, Vise Ministru Ivo Valente hetan pergunta barak konaba direitu ba rai, no eviksaun nebe sidadaun sira sai vitima, nune mos konaba imigrantes ka sidadaun estrangeiros nebe halao negocio iha Timor -Leste, hatan ba assuntu refere, katak, Projectu de lei 3 iha ona Parlamentu Nasional, sei hein agenda no audiencias sira hodi diskuti, nune mos fo atensaun ba lei imigrasaun atu dirasaun imigrasaun bele implementa.

Vise Ministru Justiça, Ivo Valente nudar mos eix Procurador da Republika, explika liu tan artikulasaun sira ba perguntas nebe relasiona ho krime sira, inklui krime ba korrupsaun, nebe entidade estadu sira hanesan PGR, KAK no PDHJ nia papel importante atu kombate krime oin-oin.

Iha sesaun Enseramentu, halao aktu ba intrega simbolikamente, Livrus konaba Konstituisaun RDTL nian, Kodigu Penal noo Kodigu Prosesu Penal hamutuk livru 900 (atus sia), hodi tau iha biblioteka UNPAZ nian !

Termina seminariu iha tuku 12.30 oras Timo-Leste.