Dili, Ministeriu da Justiça liu husi Diresaun Nasional ba Direitu Umanus no Sidadania (DNDHC) servisu hamutuk Universidade Dili (UNDIL) hodi halao Palestra ho tema “ Direitu no Dever Núdar Sidadaun Iha Estadu Demokrátiku” ne’ebé hato’o husi S.E. Vise Ministru Justisa, Ivo Valente iha salaun UNDIL. Programa palestra ne’ebé akompanadu husi Reitór UNDIL, Dr. Antonio Cardoso no Director Nasional Direitus Humanus no Sidadania, Dr. Celito Cardoso
Iha abertura Reitor UNDIL, Dr. Antonio Cardoso Machado hateten” husu agradese ba Ministeriu da Justiça nia inisiativa no apoiu Palestra ida nee hodi fahe no habelar informasau ba estudantes Universitario sira hodi nune estudante hatene konaba direitu no dever núdar sidadaun UNDIL, sai hanesan sosiedade akademiku iha dever atu bele simu Direitu no Dever ne’ebé oferese husi Ministériu Justisa, impertante liu ba estudande Fakuldade Direitu atu buka no bele desenvolve perguntas no segestaun sira hanesan deseminasaun, informasaun ba ita nia komunidade.”
Vise Ministru Justiça Ivo Valente hato’o ninia Palestra ba estudante UNDIL ne’ebé nakonu iha salaun UNDIL hodi koalia kona-ba lei ne’ebé vigor iha Timor-Leste no konseitu Direito no Dever ne’ebé konsagra ona iha Konstituisaun Repúblika Demokrátiku Timor-Leste. Eis dosente Undil ne’e iha ninia palestra hateten,” estudante nudar sidadaun ne’ebé iha papel fundamentál atu asegura hodi implementa ba sidadaun hotu-hotu kona-ba direitu no dever núdar sidadaun, tamba ema balun seidauk hatene saida mak Direitu no saida mak Dever hodi nune bele hatene hodi kontribui ba desemvolvimentu nasaun Timor-Leste.”
Iha programa ne’e Director Nasional Direitus Umanus no Sidadania, Celito Cardoso ne’ebé núdar moderador esplika kona-ba objetivu ba Palestra ne’e Ministériu Justisa fahe informasaun ba komunidade iha teritoriu Timor laran tomak liu husi estudante no Ministériu Justisa halo doasaun livrus ba Universidade UNDIL.
Audiensi ba palestra ne’e mai husi estudante Fakuldade nen (6) ne’ebé ejiste iha UNDIL inklui Vise Rektor sira, Dekanu Fakuldade no Dosente sira hotu hamutuk ema nain atus tolu (300). Palestra ne’e remata ho entrega simbolikamente Livrus kona-ba Konstituisaun RDTL, Kodigu Penál no Kodigu Prosesu Penál ho total hamutuk livru atu sia (900) ne’e hodi tau iha biblioteka UNDIL nian atu nune estudante sira bele asesu kona ba lei ne’ebe vigora iha nasau Timor- Leste. Programa hanesan ne’e halao ona iha Unital no Undil, tuir planu sei kontinua atu halao iha Universidade Nasional Timor-Lorosa’e no Universidade da Paz.

Gil Danilo de Menezes Ximenes.
Tekniku Professionál Divulgasaun DNDHC