DIREITÓR hosi Diresaun Nasionál Terras Propriedade no Servisu Kadastrais (DNTPSC) iha loron Kuarta 23, no loron Sesta, 25 fulan-Outubro 2013 foin lalais ne’e hala’o enkontru ho ho autoridade lokál sira hosi Sub Distritu Vemasse no Sub-Distritu Baucau Vila hodi ko’alia kona-ba auto Estrada ne’ebé sei implementa iha tinan 2014 tinan oin, enkontru hanesan hala’o mós iha Distritu Likisa.

Iha enkontru ne’ebé fasilita hosi Membru Asian Development Bank (ADB) ne’e, Diretór DNTPSC, Romão Guterres husu ba komunidade no autoridade lokál sira hodi bele haree diadi’ak rai komunidade nian sira ne’ebé afeta ba auto Estrada ne’ebé sei halo iha 2014 tinan oin.

Nia hateten, bainhira komuidade sira nia rai no kintál ruma maka afeta ba iha auto Estrada ne’e, hakarak ka lakohi komuidade sira tenki entrega ba estadu nune’e bele halo dezenvolvimentu.

Tanba tuir nia, bainhira rai ruma maka afeta ba iha atividade estadu nian, tuir lei hanesan hakerek konstituisaun RDTL iha alinea ida maka hakerek kona-ba rai nia funsaun sosiál, nune’e.

Romão husu ba komunidade sira ne’ebé aban-bainrua sira nia rai ka plantasaun ruma afeta ba iha projetu auto estra, bainhira ekipa tékniku sira tuun ba foti ona dadus labele halo tan buat ruma iha rai ne’ebé ekipa sira halo levantamentu.

Nia hateten, bainhira rai sira ne’ebé ekipa tekniku sira foti ona dadus maka ikusmai, komunidade sira kuda tana ai-horis ruma ka halo tan uma ruma, estadu sei la fó buat ruma ba sira ne’ebé maka foin halo, estadu bele fó deit ba sira ne’ebé maka antes ne’e ekipa foti dadus sira rejistu.

Iha fatin hanesan konsultadór internasional Voluntariu Asian Development Bank, Sr. Annan husu ba lider komunitaria sira inklui mós komunidade sira ne’ebé maka partisipa atu bele fó sira nia opiniaun ne’ebé di’ak ba iha sira nune’e hosi opiniaun komunidade sira nian ne’e hosi nia parte bele kria regulamentu ruma.

Iha enkontru ne’ebé hetan partisipasaun masimu hosi autodidade lokál inklui mós lideransa komunitária ne’e hala’o iha salaun Administrasaun Distritu Baucau no Salaun Enkontru Terras Propriedade no Servisu Kadastrais Distritu Likisa ne’e hetan mós partisipasaun hosi parte Polisia Nasioál Timór-Leste.*