DiliCentro Formação Jurídica kolabora ho Programa FOTI – Timor-Leste, koperasaun Estados Unidos América, hodi realiza programa “Jornadas Criminais”, iha âmbito brankeamento kapitais, korupsaun no krimes koneksos, neébe ho ninia objektivo kontinua fo formasaun espesializada ba Magistrados, Defensores Públicos, Advogados Privados, funsionários Banco Central, Comisários no Técnicos Investigadores CAC nian no mos formandos husi CFJ nian rasik.
Programa neé halao ho seksaun de trabalho ba dala nem, durante fulan tolu liu ba, hahu husi loron 26 fulan Julho toó 11 fulan Outubro 2013, debate tema oi-oin, maka hanesan importansia kombate brankeamento kapital luta hasoru korupsaun; sirkulasaun osan iha instituisaun finanseira, entidades supervizaun, importânsia mekanismo kombate brankeamento kapital no korrupsaun, téknikas investigasaun espesial, apreenssaun ba bens, konzelamento, lakon no invalidade negósios jurídikos.
Debate mos konaba rejimes espesiais iha âmbito Proseso Penal ba kazus terrorismo, kriminalidade violenta ka altamente organizada no mekanismos auxílio judisiário mútuo iha matéria penal.
Debate ba nesesidade oinsa implementa mekanismos koperasaun internasional, liliu konaba kriasaun Unidade Informação Financeira (UIF), haktuir ba rekomendasaun husi Gabinete de Acção Financeira (GAFI).
Analiza mos elementos tipos legais krime oi-oin, hanesan, suborno, pekulato, abuzo poder no tráfiko influênsia.
Objektivo jeral husi formasaun neé hodi fo ba partisipante hotu-hotu, informasaun, prosedimentos, metodolojias no instrumentos neébe presiza hodi bele detekta, identifika no karakteriza fenómeno kriminal ba brankeamento kapitais no korrupsaun.
Programa neé ensera husi S.E. Vice-Ministro Justiça, Dr. Ivo Valente, neébe manifesta ninia interese no suseso ba seminário ida neé, aproveita oportunidade hodi realsa katak Ministério da Justiça koloka aktores nasionais sektor da Justiça presiza iha aseso ba instrumentos no téknikas de trabalho maka presiza hatene, detekta no luta kontra kriminalidade kompleksa nee’.

CFJ, 11 Outubro 2013