DILI-Durante loron 2 nia laran (2-3 Outubro 2013), hola fatin iha Centro Formação Jurídica (CFJ) Caicoli, ekipa lejislador Timor oan ne’ebé hak’nar a’an iha Direcção Nacional da Assessoria Jurídica e Legislação (DNAJL) Ministério da Justiça (MdJ) halo dikusaun hamutuk ho ekipa lejislador husi Ministério da Justiça (MdJ) Japaun nian. Ekipa husi MdJ Japaun ne’e kompustu husi assessor juridiku husi JICA nian Sr Kenta KOMATSU, husi International Cooperation Department (ICD) MdJ Japaun, Sr. Hiroshi SUDA no Prof. Tsuneo NIKI husi Universidade Osaka, Japaun. Programa ida ne’e hanesan implementasaun ba akordu bilateral entre nasaun 2 iha area kapasitasaun rekursu humanus seitor da justisa nian, liu-liu ba parte lejislasaun nian.

Tuir Direitor DNAJL, Nelinho Vital hateten katak :”kooperasaun entre DNAJL ho ICD MdJ Japaun ne’e hahú kedas iha 2009. Ba tinan ida ne’e, parte kooperasaun sei foka liu ba kapasitasaun lejislador DNAJL nian iha parte hakerek lei nomos halo analiza ba artigu husi lei nian. No sai hanesan ejemplu ba diskusaun maka projeitu lei konaba mediasaun nian”.

Kooperasaun ho MdJ Japaun ne’e iha natureza ida atu peskiza hamutuk no estuda hamutuk. “Sira (MdJ Japaun) mai fahe sira nia experiensia nomos sira nia matenek atu hodi ajuda lejislador DNAJL ba prepara projeitu lei ida ne’e to’o remata. Importante katak, Timor oan sira mak kaer prosesu inklui ba foti desizaun ba projeitu lei ida ne’e”, informa liu tan Direitor Vital.

Tuir observasaun, durante loron 2 seminar ne’e, hatudu antusiasmu bot husi parte Timor oan sira atu rona nomos halo diskusaun ho ekipa husi MdJ Japaun. Durante diskusaun konsege hamosu konkluzaun lubuk ida ba ekipa lejislador DNAJL ne’ebé prepara esbosu lei ne’e, hanesan kria artigu konaba definisaun, atu harí komisaun nasional mediador nian, inklui sira nia funsaun no kompetensia.

Tuir Sr. Pascoal Soares, Xefe ba Programa ne’e katak: “diskusaun tekniku ho ekipa MdJ Japaun ne’e halo ba dala rua ona, konta husi fulan Julho liu ba, hodi diskuti esbosu lei mediasaun nian, no tuir planu sei halo diskusaun dala ida tan iha tinan ida ne’e nia laran. Razaun halo diskusaun ho Japaun tamba aliende ita nia sistema justisa hanesan ho sira (Sivilista), no hanesan ita hotu hatene Japaun iha sistema mediasaun ida diak tebes”.

@Florindo da Costa, DNAJL