Dili- DNAJL (Direcção Nacional da Assessoria Jurídica e Legislação) Ministério da Justiça hahú iha loron Segunda, 2 Setembru 2013 servisu hamutuk ho organizasaun MUDA (Associação para a Protecção e Promoção dos Direitos Humanos) husi Portugal, organiza formasaun espesialidade ba funsionariu DNAJL nian ne’ebé haknár aan hanesan tardutor iha Departamento de Tradução.

Formasaun espesialidade ba área Direitu no Termu Jurídiku ne’e, sei hala’o durante fulan 2 nia laran no hola fatin iha Ministério da Justiça (MJ).

Tuir Director DNAJL, Nelinho Vital katak : “formasaun espesialidade ba área direitu no termu jurídiku ida ne’e halo ba tradutor sira ho objetivu atu háforsa no hákbit liu tan tradutor sira nia konhesimentu iha parte legal nian. Tamba tradutor sira nia servisu importante tebes, hodi halo tradusaun ba lei sira ne’ebé MJ produs husi lian Portuges ba lian Tetum”.

Hanesan ita hotu hatene katak, dalen Tetum agora dadaun dezenvolvidu ona no Instituto Nasional Linguistica (INL) nomos hatúr ona padraun lian tetum ne’ebé atu banati tuir. Funsionariu DNAJL nian ne’ebé hanesan tradutor ne’e, hetan ona formasaun lian tetum husi Centro Formação Jurídica iha tinan barak nian laran.

Formasaun refere hanesan mos parte ida husi kapasitasaun rekursu humanus iha MJ nian. Formasaun ne’e partisipa husi tradutor hamutuk nain 10. Atu informa mos katak, aliende halo formasaun hanesan ne’e, DNAJL-MJ mos sei autoriza tradutor nain 2 (feto 1 no mane 1) ba eskola iha nivel Mestradu área linguistik nian, iha Universidade Porto, Portugal, iha inisiu fulan Outubro 2013.

Iha formasaun ne’e, DNAJL-MJ mos prepara Dicionariu Juridiku-Almedina nomos Dicinariu lingua Portuguesa-Aurelio atu hodi fasilita diak liu tan servisu tradusaun nian.

@Florindo