Iha loron 25 Julho 2013, Departamento Política Legislativa husi DNAJL organiza diskusaun tekniku ho Gabinete Inspeksaun no Auditoria (GIA), Ministério da Justiça nian ba proposta diploma konaba Estrutura Orgânica GIA nian. Diskusaun tekniku legal ne’e, hala’o iha Sala Reunião MJ, Dili no hetan partisipasaun maximu husi Sr. Inspektur Jeral, Sub Inspektur nain 2 nomos tekniku balun husi GIA nian, inklui estajiariu husi Fak. Direitu UNDIL nian ne’ebé hala’o estajiu iha DNAJL.

Direitor DNAJL, Sr. Nelinho Vital ne’ebé lidera diskusaun ne’e informa katak, diskusaun ida importante tebes atu hodi rona informasaun mais detalhadu husi parte GIA nian, molok atu finaliza projeitu diploma ne’e no submete ba aprovasaun Sr. Ministro da Justiça nian. Aproveita opurtunidade ne’e, ekipa husi DNAJL esplika mos konteudu husi Decreto Lei no.2/2013, data 6 de Março konaba Estrutura Orgânica Ministério da Justiça nian. Tamba iha Decreto lei refere, hatúr ona k’nar husi kada diresaun iha Ministério da Justiça, inklui kompetensia husi GIA nian. Ho nune’e, atu bele ajuda liu tan ekipa GIA nian ba prepara sira nia estatutu rasik.

Diskusaun tekniku ida ne’e, la’o diak tebes ho ambiente ida ne’ebé konstruktivu tebes, tamba ekipa husi GIA nomos ekipa DNAJL nian, halo diksusaun ida ativu hodi hatan ba malu konaba prekupasaun tekniku ne’ebé mosu. Husi diskusaun ne’ebé hala’o iha oras 2 ho balun nia laran ne’e, ikus mai hamosu duni konkluzaun ida diak atu legaliza no haforsa k’nar GIA nian, liu husi elaborasaun projeitu diploma ministerial konaba estrutura orgânika GIA nian.

Iha fali parte lokraik, ekipa DNAJL atu halo mos aprezentasaun materia Decreto Lei no.2/2013 nomos diskusaun tekniku ba esbosu diploma ministerial konaba estatuto organika Diresaun Nasional Registu Notariadu (DNRN) nian ba Directora ho nia ekipa, maibe planu ne’e la konsege implementa tamba ekipa DNRN iha asuntu urjente ida mak sira tengki tarata. Ho nune’e, diskusaun ne’e adía fali ba loron sleuk.

@Florindo-DNAJL