Kinta – 4 de Juñu de 2009

MINISTRA Justisa IV Governu Konstitusionál, Dra. Lúcia Maria Brandão Freitas Lobato, Kinta (4/6) foin lalais hala’o ninia vizita ba edifisiu foun Dirasaun Nasional Terras Propriedade e Servisus Cadastrais (NDTPSC) Bebora Dili.

Vizita refere hala’o wainhira MJ ba halo lansamentu públiksaun mapa kadastral, iha vizita ministra nian ne’e hetan mos akompaña hosi Diretór Jeral MJ, Crisogno da Costa Neto, Diretór Jeral Defensoria Públika, Sergio da Costa Hornai, Diretór Diresaun Nasionál Direitus Humanus no Cidadania, Lucas Antonio da Costa, Diretora Diresaun Nasional Assosiasaun Juridiku e Lejislasaun, MArcelina Tilman, Xefe Gabinete Ministra da Justiça, João Filipe Alves Coreia, ho hetan akompaña hosi Diretór Terras Propriedade, Antonio Verdial de Sousa.

Iha vizita Minista nian ne’ebé ho tempu besik horas ida ne’e, kria mos deskusaun kikoan entre funsionario hosi diresaun refere ho Ministra.Nune’e ministra mos husu dadus rai nian ne’ebé oras ne’e diresaun iha.Inklui husu mos rai no uma ne’ebé diresaun halo ona rejistu.
Remata tiha ninia vizita, ministra mos hateten, estadu tenki halo ona sertifikadu ba ema sira ne’ebé mak dadus tama ona ba iha data base DNTPSC nian.

Iha tempu badak MJ sei kria enkontru ho embaixadór Nasoens Unidos Amerika, tanba durante ne’e povu hosi nasaun refere mak ajuda foti dadus kona ba rai liu hosi programa Ita Nia Rai. Durante ne’e Ita Nia Rai mak halo levantamentu dadus kona ba rai ne’ebé kumesa ona iha distritu Liquiça no Manatuto, tenik Ministra.

Tuir ministra, molok tinan ne’e remata sei hala’o mos iha Dili. Estadus Unidos Amerika mak fo apoiu ba projetu ne’e.“Hau mos rona katak, orsida projetu ne’e lao no orsida la lao. Ho ida ne’e hau hakarak enkontru ho embaixador hodi husu informasaun detalladu, atu ita bele hatene ajuda governu Amerikanu nian to’o iha ne’ebé, sei kontinua ka lae, nune’e mos sira sei iha orsamentu dispunivel atu bele aumenta tan projetu ne’e ou lae. Maibe karik sira dehan orsamentu ba projetu ne’e limitadu,” Nia haklaken.

Ministra hateten, tuir governu nia planu sobre kolekta dadus kona ba rai. Iha tinan 2 ka tolu nia laran tenki remata.*

Ananias Babo Horta

Media Officer Gabinete Ministra da Justisa.