Vise Ministru Justisa, Ivo Valente ho ekipa tekniku inklui Diresaun Nasional Rejistu Notariadu (DNRN) no Diresaun Nasional Terra Propriendades Servisu Kadastrais (DNTPSC) halo programa divulgasaun lei no fahe informasaun relevantes ba komunidade iha sub-distritu Lolotoe distritu Bobonaro iha 13 Juñu 2013.
Maske udan boot no kondisaun Estrada la permite atu halo viajen ba distritu, maibe tamba haktuir planu asaun annual ba Diresaun Nasional dos Direitus Umanus no Sidadania (DNDHC) nian ne’ebé planeadu ona tenke halao duni programa divulgasaun leis hanesan iha sub-distritu sira seluk iha sub-distritu Lolotoe.

Molok atu to’o iha sub-distritu Lolotoe distritu Bobonaro, S.E. Vise Ministru Justisa, Ivo Valente ho ekipa hasoru obtaklu boot mak dezastre natureza (udan boot) ne’ebé fo impaktu negativu halo estrada kotu no rai halai, halo komunidade sira labele halo viajen ba kapitak distritu Bobonaro.

Maske nune’e Vise Ministru ho ekipa ho esperansa boot atu hato’o informasaun ba komunidade iha sub-distritu Lolotoe. Tamba durante ne’e komunidade sub-distritu ne’e la hetan informasaun kona-ba saida mak ministériu Justisa halo ona iha area justisa nian.
iha abertura Vise Ministru Justisa, Ivo Valente hateten” programa divulgasaun hanesan ohin loron ita halo iha sub-distritu Laolotoe ne’e ami halo bebeik ona iha distritu sira seluk maibe sub-distritu Lolotoe ohin mak foin mai iha ne’e hodi fahe informasaun no kuñesementu ruma ba komunidade sira iha sub-distritu Lolotoe. Objektivu husi programa divulgasaun ne’e primeiru joven sira iha ne’eatu iha koiñesementu kona-ba saida mak akontese iha nasional, kona-ba saida mak inportante ba povu Lolotoe atu hatene no saida mak inportante iha fronteira”.
Iha programa divulgasaun lei ne’e Vise Ministru hatutan liu tan dehan” servisu Ministériu Justisa la hanesan ho servisu Ministériu sira seluk ne’ebé konkretu (bele hare ho matan) hanesan ho Ministériu Infrastrutura ne’ebé mai halo Estrada ba komunidade sira,Ministériu Agrikultura kuandu mai hanorin kona-ba oinsa hakiak kuda hodi fo han diak atu ema bele sosa, Ministériu Saude karik mai hare ema moras sira hodi fo aimoruk no sona sira ne’e hotu halo servisu dezemvolvimentu fiziku ne’ebé konkretu. Mais Ministériu Justisa ninia servisu abstraktu teb-tebes (ita labele hare ho matan) koalia de’it ho ibun no kaer surat tahan de’it maibe fo ninia inpaktu positivu boot teb-tebes ba ita nia vida Sosial, Ekonmiku hotu-hotu iha. Ho nune Lei ne’e se ita la hare mak sei fo inpaktu ba ita nia vida moris lor-loron.”

Iha fatin hanesan Directora DNRN, Maria Fatima lori materia ne’ebé koalia kona-ba: oinsa komunidade iha fronteira bele uza Passaporte, Passa Fronteiras no oinsa atu hetan dokumentu ne’e inportante liu tenke iha uluk sertidaun Moris ka sertidaun RDTL no Billete Identidade. Nune mos eis Director DNTPSC, Antonio Verdial lori materia kona-ba asuntu rai.
Ekipa Vise Ministru ne’ebé ba halo programa divulgasaun mak, Directora DNRN, Maria Fatima, Director DNDHC, Celito Cardoso, eis Director DNTPSC, Antonio Verdial, Adjuntu Administrador distritu Bobonaro, Julio Caero no adjuntu komandante PNTL distritu Bobonaro.

João Maupelo da Costa
Relasaun Públiku DNDHC