Dili - Governu Australia ho governu Timor Leste halaó diskusaun ba estrategía Dezenvolvimentu iha tinan 2013 iha salaun enkontro Ministerio Finansas iha Kuinta-feira (13/06) hosi tuku 9.30 to tuku 11.30.
Iha diskusaun neé Ministeriu hotu-hotu aprezenta planu no programa ida-idak nia hodi diskuti hamutuk entre nasaun rua Timor Leste ho Australia, oinsa atu servisu diak liu tan iha tinan 2013.
Iha diskusaun neé Ministru Justica, Dionisio Babo iha intervensaun sita pontu lima mak sai nudar prioridade ba seitor Justica hanesan dezenvolvimentu institusional, reforma legal, dezenvolvimentu rekursu humanu, infra-estrutura no Informasaun Teknologia, no mos asesu ba justica.
“Sistema justica iha Timor Leste tenke iha kredibilidade, independenti, transparente, efektivu, efisensia, imparsial no justu, liu husi dalan ida neé deit maka bele asegura estadu de direitu. Atu hetan objektivu sia neé presija tempu neébe naruk atu toó iha neéba, maibe ami fiar katak ami laos atu lao mesak maibe tenke servisu hamutuk ho governu tomak, Parlamentu, doadores no mos povu em jeral” dehan Ministro Justisa iha nia intervensaun.
Hafoin halo diskusaun neé governu Australia liu husi nia Angensia Internasional Ausaid neébe durante neé sempre fo apoiu ba governu Timor Leste iha seitor hotu-hotu maibe ba tinan ida neé governu Australia tau liu prioridade ba seitor Agricultura, Infra-Estrutura, no aldun tau importansia ba seitor Justica. Governu Australia tau deit ossan ba prioridades seluk maski iha governu sira remata ona programa “case management” iha tribunal sira no mos reforma no formasaun ba policia.
Maski nune, Ministro Justisa Dionisio Babo, hateten katak, seitor justisa sai algo kritika hosi públiku tanba deit frakassu nebe iha no mos tanba seitor ida ne sei foun no seidauk hamriik metin, maski reforma barak mak introduz ona. “ema barak kontinua kritika seitor ne’e no tanba ne’e ita preciza dudu makaas liu tan, no preciza nafatin doadores sira nia tulun atu bele hametin liu tan seitor ida ne’e, tenik Babo iha nia intervensaun.

Maibe hare hosi diskussaun iha seitor iha leten, hatudu katak governu Australia ladun tau importansia ba iha seitor justisa no la hare hanesan prioridade importante iha tina 2013. Sira iha interesse liu iha infraestrutura, reforma administrative ho Agriculura no edukasaun.
Tuir Diretor ida nebe lakoi temi nia naran, “katak estadu australianu nia polítika hakarak hare liu ba seitor nebé iha vizibilidade públika no ladun interesse iha seitor justisa tanba iha ligasau ho sira nia polítika interna”, katak hare justisa hanesan ladun importante ba paiz sira hanesan Timor-Leste.
Ita espera katak parseria entre Australia ho Timor-Leste sei bazeia liu ba prioridade nebé kada Ministério ida-idak hato’o duke bazeia deit ba interesse doador nian nebe’e dala barak la kondiz ho realidade iha terreno. Tanba ne’e Timor-Leste nebe lidera G7+ (nasaun frágeis) no sai pioneiro ba konseito New Deal tenki hakaas aan atu labele tolan tomak deit assistensia sira ne’e, maibe tenki hatete ba doadores sira atu bele rona uma-nain nia preokupasaun no tau nudar prioridade semi iha tendensias politikas.