SEKRETÁRIU Estadu Terras Propriedade (SETP) Jaime Xavier Lopes, iha loron Sesta, 7 fulan Juñu 2013, partisipa iha programa nahe biti-boot no tara-bandu ba iha Sub Distritu Atabae Distritu Bobonaro.
Programa nahe-biti-boot ne’e relasiona ho akontesementu taa-malu ne’ebé akontese iha loron 25 fulan-Outobru 2012 hodi rezulta ema nain 6 mate iha fatin, nain 4 hetan tratamentu intensive iha Hospitál Nasional Guido Valadares Dili.
Prosesu nahe biti-boot ne’e hahuu ho haketak mean no halo malirin fila-fali fatin akontesimentu tuir lisan atabae nian.

Iha biban ne’e, SETP sai hanesan testamuña hodi Assina regra sira e’ebé maka atu uza iha tara-bandu nian ne’ebé hetan apoiu orsamentu hosi Ministeiru Solidaridade Sosial no United Nations Development Program.

SETP liu hosi ninia intervensaun ba komunidade sira ne’ebé partisipa iha seremonia nahe biti-boot no tara-bandu ne’e hateten, rai prinsipál ba ema hotu nia moris, atu halo atividade saida deit sempre halo iha rai nia leten, nune’e mós atu halo dezenvolvimentu ruma mós presiza halo iha rai nia leten.

Relaisona ho ema oho-malu tanba rai, SETP husu ba komunidade sira tomaka tenki para ona ho oho-malu, bainhira mosu problema ruma tenki rezolve ho ulun malirin, nune’e labele halakon ema seluk nia vida.

Iha oportunidade ne’e SETP esplika mós kona-ba artigu 54 iha konstituisaun RDTL hodi ko’alia kona-ba direitu ba propriedade privadu. dalaruma komunidade sira laduun hatene didi’ak saida maka hakerek iha lei, tanba ne’e iha 2003 mosu Lei no 1./2003, hodi ko’alia kona-ba lezislasaun rai nian, nune’e sasan ne’ebé maka estadu portuges no Indonesia hosik hela, governu Timór-Leste maka iha direitu atu bele administra.

Ne’e lideransa komunitária sira mós prekupa ho baliza administrative suku ho subdistritu nian, tanba kestaun ne’e komunidade sira sempre prekupa liu-liu komunidade sira ne’ebé hela besik iha baliza, dalaruma sira hela iha suku ida maibé sira hakarak hateten sira la’os iha suku ida sira hela ba e sira hateten dehan sira komunidade suku seluk nian.

iha programa nahe biti-boot no tarabandu ne’e hetan partisipasaun hosi Vise Ministru Solidaridade Sosial, Sekretáriu Estadu Arte Kultura, Sekretáriu Estadu Terras Propriedade, Country Director UNDP, Administradór Distritu Bobonaro, Administradór Sub Distritu Atabae, Komandante PNTL Bobonaro, Komandante Eskuadra Atabae inklui mós lideransa komunitáriu no komunidade sira hosi suku haat.*