Iha loron 10 Junho 2013, Departamento Política Legislativa husi DNAJL organiza diskusaun tekniku ho parseiru sira ba proposta lei konaba Código das Crianças nian. Diskusaun tekniku legal ne’e, hala’o iha Centro Formação Jurídica 9CFj) Caicoli Dili no hetan partisipasaun maximu husi matenek nain sira hanesan juiz, advogados, MSS, CNDC, civitas akademika nomos sosiadade civil.

Iha abertura ne’ebé hala’o direitamente husi Direitor DNAJL, Sr. Nelinho Vital informa katak, projeitu lei ida ne’e nia prosesu ba hakerek kleur ona. Projeitu ne’e aprezenta ona ba iha IV Governo Constituicional maibe la konsege aprova. Tamba kaduka, entaun projeitu ne’e tengki hahú foun fali nia prosesu. Sr. Vital mos akresenta tan katak : “ba prosesu ida ne’e, sei responsabiliza husi jurista (legal drafter) Timor oan sira, ne’ebé ha’kman aan iha DNAJL nian”.

Durante diskusaun, sei mosu nafatin debate konaba definisaun labarik nian, ne’ebé tuir rekomendasaun balun katak tengki separa tiha ho idade jovens nian. Aliende ne’e, iha mos hanoin konaba oin nusa atu regula konaba planeamentu familiar,m atu nune’e bele fó liu proteksaun ba labarik.

Tuir Xefe Dep. Política Legislativa nian, Dr. Honorio Magalhães, ne’ebé responsabiliza ba programa ne’e katak: “diskusaun ne’e atu haforsa liu tan jurista/legal drafter Timor oan sira nian iha parte hakerek lei nian. Tamba liu husi diskusaun tekniku hanesan ne’e, bele hetan tan idea foun ho baze situasaun Timor nian ba prepara ita nia lei rasik”. Xefe Honorio mos akresenta liu tan katak, programa ida ne’e foin hahú no sei la para iha projeitu lei ida ne’e deit, maibe sei kontinua nafatin ho projeitu lei seluk ne’ebé prepara ona husi Ministério da Justiça. Iha loron Quinta-feira semana ne’e, sei iha tan diskusaun tekniku hanesan ba projeitu lei konaba asesu ba tribunal. Xefe ne’e iha esperansa bot katak, partisipasaun maximu husi maluk relevante sira, sei hamosu diskusaun ho argumentu legal ida ne’ebé forte ba preparasaun hakerek artigu iha lei nian.

@Rita S-DNAJL