Iha loron 29 Maio 2013, hafoin loron dahuluk Konferensia XIII Ministro Justisa (KMJCPLP) nian, iha parte lokraik, Sr. Ministro Justisa Timor-Leste Dr. Dionísio Babo halo sorumutu bilateral ho nia hómologu Dra. Paula Texeira, Ministra Justisa Portugal, iha Hotel Sheraton, Lisboa. Sorumutu ne’ebé nakonu ho amizade ne’e hala’o durante minute 30 nia laran.
Durante sorumutu ne’e, halo diskusaun barak liu konaba kooperasaun iha area justisa no formasaun juridika nian entre nasaun rua. Iha biban ida ne’e, Sra. Ministra Justisa Portugal nian sujere atu kri aprotokolu sumbrinha ida (jeral) hodi regula konaba kooperasaun entre nasaun rua nian. Ba asuntu ida ne’e, Sr. Ministru Justisa Timor-Leste konkorda no simu. Iha tempu besik mai, protokolu kooperasuan iha parte jeral nomos kooperasaun iha area tekniku sira ne’e, sei asina husi parte rua. Kooperasaun teknika ne’ebé atu estabelese entre MJ Timor-Leste no Portugal maka iha area formasaun juridika, assessoria juridika, polisia judisiaria nomos servisu registo nian.

Alende kooperasaun iha futuru nian ne’e, entre Governante nain rua ne’e mos koalia hodi halo avaliasaun ba servisu hamutuk ne’ebé durante ne’e hala’o ona. Husi parte rua hare katak iha duni pasu pozitivu ba kooperasaun ne’ebé establese ona durante ne’e.

Iha fatin hanesan, halo mos diskusaun konaba proposta alinhamentu ba Xefia KMJCPLP ho Presidente CPLP husi Xefe Estado nian. Tamba ida ne’e, sei fó oportunidade ba MJ Timor-Leste atu lidera mos KMJCPLP iha tinan 2014 oin mai. Ho nune’e, iha hanoin hela konaba oin nusa atu halo preparasaun diak nomos asistensia ne’ebé MJ Portugal atu fó ba MJ Timor-Leste.

Sorumutu ne’e remata ho troka prenda entre MJ Timor-Leste ho MJ Portugal hanesna sinal ida diak ba hametin liu tan laxu amizade entre Timor Leste ho Portugal. Membru delegasaun husi MJ Timor-Leste ne’ebé maka partisipa iha sorumutu bilateral ne’e maka Dr. Nelinho Vital, Direitor DNAJL no Dra. Patricia Coutinho, Assessora Juridika. Husi parte MJ Portugal nian maka Xefe Gabinete Sra. Ministra Justisa no Xefe Relasaun Internasional DGPJ nian.

@Ilda-GMdJ