Durante estadia ofisial iha Lisboa, Portugal hodi partisipa iha XIII Conferencia Ministros da Justiça CPLP (CMCPLP), Sr. Ministro Justisa, Dr. Dionísio Babo, vizita mos Campus da Justiça hodi halo sorumutu ho Notarios no Conservadores husi Timor-Leste ne’ebé durante ne’e hala’o hela formasaun iha Portugal.Notario no Conservadore hamutuk ema nain 10 maka haruka husi Direcção Nacional do Registo e Notariado (DNRN) mai halo estajiu iha Portugal ne’ebé tuir planu formasaun ne’e sei remata iha fulan Julho ne’e.
Iha sorumutu ne’e, estajiariu sira hato’o mos sira nia prekupasaun lubuk ida ba Sr. Ministro hanesan implementasaun ba rejime kareira Notario no Conservador sira nian, implementasaun lei konaba emolumentos nomos konaba koloka Notario no Conservador sira tuir sira nia espesialidade. Aliende ne’e, sira hato’o mos prekupasaun konaba oin nusa atu hadiak sistema servisu iha DNRN.

Hatan ba prekupasaun hirak ne’e, Sr. Ministro agradese tamba bele rona direitamente prekupasaun ne’ebé positivu husi formandos sira. Aliende Sr. Ministro mos hatutan tan katak, ho aproveitamentu ne’ebé formandus sira hetan durante hala’o estajiu iha Portugal, pelumenus bele iha ona konseitu nomos hanoin ida diak ba dezenvolvimentu instituisional iha futuru mai. Ho nune’e, bele hadiak liu tan servisu hodi serve ba publiku.

Iha biban ne’e, Sr. Ministro hato’o mos agredesimentu ba Instituto Registo, E.P. ne’ebé fó ona opurtunidade diak hodi simu no fó formasaun ba Noatrios no Conservadores Timor oan. Tamba hanesan ita hotu katak, to’o ohin loron Timor Leste seidauk iha Notario no Conservador. Hafoin remata formasaun ida ne’e, iha esperansa bot katak, Ita sei iha Notario no Conservador ne’ebé iha kualidade duni nomos pronto ona atu halo servisu ba publiku.

Hafoin sorumutu ne’e, Sr. Ministro Babo ne’ebé akompanha mos husi Direitor Nacional da Assessoria Jurídica e Legislação (DNAJL), Sr. Nelinho Vital, halo mos vizita kortezia ba fatin registu sidadania, registu kriminal, registu komersial hodi hare besik liu tan atendimentu publiku ne’ebé la’o hela inklui ekipamentus modernu ne’ebé uja ba halo atendimentu ka servisu registu nian.

@Ilda-GMdJ