Husi loron 29-30 fulan Maio 2013, iha sidade Lisboa, Portugal, Sr. Ministro Justisa DR. Dionísio Babo hola parte iha Konferensia Ministru Justisa CPLP ba dala XIII. Iha loron dahuluk konferensia nian, diskuti barak liu konaba luta kontra trafiku umanu nomos luta kontra korupsaun iha funsaun publiku nian iha rejiaun CPLP nian.
Konferensia Ministru Justisa sira nian ne’e, loke ofisialmente husi Primeiro Ministro Portugal Dr. Pedro Passos Coelho. Durante nia alokasaun iha abertura konferensia nian, Sr. Primeiro Ministro hato’o katak konferensia ida ne’e importante tebes tamba bele tau hamutuk hanoin iha parte legal nian konaba oin nusa atu luta kontra trafiku humano nomos korupsaun iha funsaun publiku nian. Asuntu rua ne’e sai asuntu ne’ebé factual iha mundu. Espera katak, husi konferensia Ministru Justisa CPLP nian ne’e bele hamosu deklarasaun politika ida ba luta kontra trafiku humano nomos korupsaun. Ida ne’e importante liu tan, tamba CPLP nia membru sira mai husi nasaun ne’ebé koloka iha continental Europa, Afrika, Amerika nomos Asía nian. Ho nune’e bele kontribui diak liu tan kombate trafiku humano no korupsaun iha mundu.

Hafoin ne’e, konferensia kontinua kedas ho lia fuan bemvindo husi Ministra Justisa Moçambique, Dra. Maria Benvinda Levi, hanesan Presidente ba Konferensia Ministro Justisa CPLP nia, ne’ebé lidera komesa 2011-2013. Hanesan mos Presidente da Mesa, Sr. Ministra Justiça Dra. Levi, komvida Sr. Secretario Geral Konferensia Ministro Justisa nian ne’e atu hato’o relatoriu nomo proposta ba diskusaun konferensia nian.
Iha proposta ne’ebé importante tebes ba hetan diskusaun husi Sr. Ministru sira maka konaba alinhamentu Konferensia Ministro Justisa sira nian ho Presidensia CPLP nian. Proposta ne’e hetan duni konkordansia husi Sr. Ministro Justisa sira. Ida ne’e signifika katak, ba tinan oin mai 2014, Timor Leste ne’eb’e sei sai hanesan Presidente ba CPLP, iha tinan hanesan mos sei lidera Konferensia Mininstro Justisa sira nian.
Iha loron dahuluk konferensia ne’e, Sr. Ministro Justisa sira debate ba dokumentu tekniku ne’ebé prepara antes ona husi tekniku/peritu sira konaba luta kontra trafiku humano (hala’o iha Cabo Verde) nomos luta korupasaun iha funsaun publiku (hala’o iha São Tome e Principe). Ikus mai, proposta tekniku nian ne’e, hetan duni aprovasaun husi Ministro Justisa sira.
Konferensia ne’e hetan partisipasaun husi Sr. Rui Jorge Carneiro Mangueira - Ministro da Justiça e dos Direitos Humanos República Angola; Sra. Márcia Pelegrini - Vice-Ministra da Justiça República Federativa Brasil; Sra. Madalena Neves - Embaixadora de Cabo Verde em Portugal (reprezenta Sr. Ministro da Justiça Cabo Verde); Sra. Maria Benvinda Levi - Ministra da Justiça Moçambique; Sra. Paula Teixeira da Cruz - Ministra da Justiça Portugal; Sra. Edite Ramos da Costa Ten Jua – Ministra da Justiça, Administração Pública e Assuntos Parlamentares São Tome e Principe; no Sr. Dionísio da Costa Babo Soares - Ministro da Justiça Timor Leste. Delegasaun Timoe Leste rasik kompostu husi : Sr. Francisco Cárceres (DG-Correspondencia Nacional), Sr. Nelinho Vital (Presidente do Conselho Gestão e Disciplina Advocacia), Sra. Marcelina Tilman (Directora CFJ), Sr. Antonio do Rego (Official Gabinete MJ), Sra. Ilda Canelas (Secretária MJ) no Sra. Patricia Coutinho (Assessora Jurídica MJ).