Durante estadia ofisial iha Lisboa, Portugal hodi partisipa iha XIII Conferencia Ministros da Justiça CPLP (CMCPLP), Sr. Ministro Justisa, Dr. Dionísio Babo, vizita mos ba Polisia Judiciario (PJ) Portugal nia fatin, Rua Gomes Freire, 174, Lisboa. Iha ne’e, Sr. Ministro Babo simu direitamente husi Sr. J. Almeida Rodrigues, Direitor Nasional PJ nian. Durante sorumutu ne’e, halo diskusaun barak liu ba iha tipu servisu Polisia Judisiaria ou Polisia Investigasaun Kriminal (PIK) nian. Tamba hanesan ita hatene katak, Governo Timor Leste mos dadaun ne’e, prepara ona Decreto Lei ida hodi estabelese Polisia Investigasaun Kriminal (PIK), ne’ebé nia natureza servisu la dun iha diferensia bot ho PJ Portugal nian. Aliende nia baze legal, liu husi Ministério da Justiça mos hala’o tiha ona rekrutamento no formasauan ba futuru membru PIK nian.
Atu hasa’e kualidade matenek nomos kapasitasaun profesional formandus iha PIK nian, Governo liu husi MJ haruka ona formandus hirak ne’e, mai tuir formasaun konaba servisu PIK iha Portugal. Formasaun ne’e hetan ajuda husi Projeitu União Europea iha tinan hirak liu ba.

Durante sorumutu ne’e, Sr. Director Rodrigues halo esplikasaun detailahdu ba Sr. Ministro konaba lala’ok husi PJ ne’e, inklui PJ nia orsamentu annual, rekursu humanos ne’ebé iha nomos ekipamentu ou laboratoriu ne’ebé adekuadu hodi suporta PJ nia servisu.
Sorumutu ne’e sai positivu tebes ba Sr. Ministro Babo ho nia ekipa husi parte lejislasaun nian, tamba bele fó tan ona hanoin konaba oin nusa atu estabelese Timor Leste nia PIK ne’e. Tamba PIK hanesan instituisaun estadu ida ne’ebé foun iha estrutura estado Timor Leste nian, ne’ebé foin maka atu estabelese. Ho nune’e, persiza rona, hare no estuda barak liu tan husi nasaun seluk nia esperiensia.
Iha sorumutu ne’e Sr. Ministro informa mos tan katak, aliende regulamentu nomos rekursu humanos ne’ebé iha ona, MJ mos iha ona planu atu harí edifisiu foun ba PIK ne’ebé kompleta mos laboratoriu sentral ida. Tuir planu, obra ne’e sei hahú iha tinan oin mai.

Hafoin halo tiha sorumutu ho Direitor Nasional PJ nian, ekipa Sr. Ministro Justisa nian, ne’ebé inklui mos Direitor Nasional da Assessoria Jurídica e Legislação, Dr. Nelinho Vital, Sr. Conselheiro ba Embaixada Timor Leste iha Portugal, Sr. Jesuíno de Oliveira Alves, no Dra. Patricia Coutinho, Assessora Jurídica, halo mos vizita/tour ida ba iha laboratoriu PJ nian. Delegasaun Timor Leste ne’e vizita ba fatin hanesan lab. Balistiku, lab. Forensic, lab. Toxologias nomos lab. ba halo teste DNA nian, hodi hare besik liu tan oin nusa tekniku professional sira hala’o sira nia servisu hodi suporta ajente sira iha kampu/terenu.
PJ ka PIK ne’e hanesan mos orgaun judisiariu ida ne’ebé iha k’nar spesifiku ba krime grave sira hodi halo investigasaun no relatoriu ba Ministério Público, hanesan tutelar ba krime tuir Código Processo Penal haruka.
Vizita Sr. Ministro Justiça ho nia ekipa ne’e, remata ho troka lembransa entre institusaun rua, ne’ebé sai mos hanesan simblu ba hametin laxu amizade.