Iha loron 26 Maio 2013, hola fatin iha sidade Praia, Cabo Verde, Presidente Conselho do Gestão e Disciplina da Advocacia (CGDA), Dr. Nelinho Vital, asina akordu kooperasaun ho Bastonária Ordem Advogado Cabo Verde (OACV), Dra. Leida Helena Maurício dos Santos. Akordu kooperasaun ne’e, asina ho objetivu atu hametin lasu kooperasaun entre instituisaun advogado nasaun rua nian.Hafoin asina akordu iha edifio OACV, Presidente CGD, Dr. Nelinho informa katak, ida ne’e hanesan aktu importante ida ba dezenvolvimentu CGDA hanesan embrio husi Ordem Advogado Timor Leste nian iha futuru mai.Tuir akordu ne’e, OACV sei haruka informasaun nesesariu, tuir pedidu CGDA, liu-liu konaba advogado Cabo Verdiano ne’ebé hakarak ezerse funsaun advokasia iha Timor Leste. Tamba tuir Lei no.11/2008 alterado ho Lei no.1/2013, fó dalan ba advogados estrangeiros atu hala’o k’nar advogado nian iha Timor Leste.

Ho akordu ne’e sei ajuda tebes CGDA molok atu foti desizaun konaba aplikasaun husi advogado Cabo Verde sira nian ne’ebé hakarak hala’o funsaun iha Timor Leste, hatutan Dr. Nelinho.

Iha fatin hanesan, Dra. Leida, Bastonária OACV mos informa katak, ho akordu ne’e, sei sai hanesan instrumentu ida hodi loke dalan ba kooperasaun diak entre OACV ho CGDA ne’ebé foin establese iha fulan hirak liu ba ne’e.

OACV mos prontu atu tulun CGDA ba preparasaun harí Ordem Advogado Timor Leste nian iha futuru mai. Tamba hanesan ema professional ne’ebé ho dignidade (officium nobile), sira sei halibur hamutuk malu iha instituisaun Ordem Advogado nian, hodi nune’e sira bele hala’o sira nia funsaun ho diak ba defende direitu ema sira ne’ebé buka lia los iha justisa nomos sai defensor ba demokrasia, hatutan Dra. Leida, ne’ebé foin simu posse iha fulan 2 liu ba ne’e.

Hafoin asina tiha akordu kooperasaun ne’e, Presidente CGDA ne’ebé akompanha mos husi Directora Centro Formação Jurídica, Dra. Marcelina Tilman, kontinua kedas ba seremonia enseramentu formasaun ba advogados estajiariu Timor Leste nian iha Cabo Verde. Estajiu ne’e hala’o durante fulan 2 nia laran hodi kompleta faze teoria nian antes atu hakat ba faze exame final. Tuir planu, advogados hamutuk ema nain 27 ne’e, sei fila hikas ba Timor Leste iha loron 31 Maio ne’e no sei halo exame final iha fulan Julho nia laran.

Iha biban ida ne’e, Presidente CGDA, hato’o nia apresiasaun tomak ba OACV ne’ebé hatudu ona vontade diak hodi simu no halo formasaun ida diak ba futuru advogado Timor Leste nian, maske iha tempu ne’ebé limitadu nomos obstaklu oin-oin ne’ebé hasoru. Iha esperansa bot nafatin ba Ita nia governu atu tau nafatin importansia ba dezenvolvimentu rekursu humanu , liu-liu iha seitor justisa, hanesan dalan importante ida ba dezenvolvimentu nasional, dehan Dr. Nelinho iha nia diskursu. Seremonia ne’e remata ho fahé sertifikadu ba formandus sira.

Nelinho Vital