Dili tuir Deputada Albina Pereira husi bankada CNRT iha nia intervensaun hateten katak Ministeriu Justica tenke hare didak lei ida hodi regula krime inseste neébe agora dadaun akontese barak iha rai ida neé tamba toó agora ami sei dauk hare lei ida mak atu koalia kona ba krime ida neé.

“Hau husu ba Sua Ex Ministru Justica atu hare hodi tau lei ida atu bele regula krime insestu neébe agora dadaun akontese iha Timor Leste tamba toó agora ita sei dauk iha lei ida atu bele kastigu ema neébe komete krime insestu neé”Dehan Deputada Albina iha Parlamentu Nasional Terca (21/05).

Hatan ba kestaun neé Ministru Justica,Dionisio Babo informa katak lei ida atu koalia espesifiku liu kona ba krime insestu mak la iha maibe lei violasaun seksual mos kontempla hotu iha neéba la signifika katak ema neébe halo krime ida neé lahetan kastigu.

“Iha ita nia lei Kodiku Penal la hakerek espesifiku kona ba krime insestu maibe kontempla hotu iha lei violasaun seksual tamba ita iha lei violasaun seksual neébe ratifika ona iha kovensaun direitus Humanus nia”Dehan Ministru Justica Dionisio Babo.

Iha fatin Hanesan mos Vice Ministru Justica, Ivo Valente informa tan katak krimi insestu dala barak ita buka iha juridiko la iha e mos krime violasaun seksual la koalia mos kona ba insestu mas la signifika katak ema neébe halo krimi insestu la hetan kastigu,iha ita nia lei Kodiku Penal artigu artigu 182 no 1 alinha d mos koalia katak sei hetan kastigu um tersu.