Dili, Vise Ministru Justisa, Ivo Valente nudar mos Presidente Board ba organizasaun sosiedade sivil / NGO ( Judicial System Monitoring Programme / JSMP), loron 26 – 04 - 2013 iha Delta Nova. partisipa aniversariu JSMP ba XII, fo tomada de Posse ba Director foun ezekutivo JSMP ba 2013 to o 2017, Lansamentu Relatoriu sosiedade Sivil ba Sector Justisa, no ho Debate Akademista ba Asunto Insestu.

Ivo Valente, nudar Presidente Board iha nian intervensaun katak iha 28/04/2001 JSMP harí iha tempo nebe defcil, hasoru maibe konsege ultrapassa desafius lubuk ida, kongratula ba ideias nebe mai husi fundador sira (hanesan Sr.Nelson Belo) maibe agora dadauk ne JSMP mos fo ona konstribuisaun ba povu Timor – Leste, husi Monitorizasaun ida nebe professional, ba sistema Justisa no mos ikus mai ba Parlamentu nasional, JSMP mos iha papel importante atu halao divulgasaun lei sira, nebe servisu hamutuk ho Ministeriu Justisa, ho entidades Estado sira seluk hanesan, Tribunais, PGR, Defensoria Publica, PDHJ etc... JSMP sei minimu ho rekursus humanos (limitado) no ho apoiu husi assessor Internasional, doadores, atu halão atividade JSMP nian iha rai doben ida nee.

Iha tinan ida ne directur JSMP termina nia mandatu, ho nune BOARD JSMP hahu halao selesaun ba kandidatus director JSMP, (nain 5) konkursu nee, halao ho rigorozu, hodi hare rekezitus administrativus no selesaun liu husi Intervista. Kandidatu 3 nebe liu Sr. Luis Sampaio selesiona ba Director JSMP priode 2013 to o 2017.

Seremonia ne mos partisipa husi Primeira Dama Sra. Isabel Fereirra, Ministru Justisa Sr. Dionisio Babo, Adjunta Prokuradora Geral da Republika Sr. Zelia Trindade, Defensor Publiku Sr. Sergio Hornai, Adjunto Provedor Direitos Humanos Sr.Silverio Pinto, Doadores no Estudates Universitaria nebe sei partisipa iha debate akademiku ba assuntos Insestu, iha Timor laran.

Iha Intervensaun ba dala ikus, husi Primeira dama, inkoraja partisipasaun aktiva husi Entidades estado atu kontinua papel edukasaun sivika, atu prevene krime insestu, nune mos papel edukasaun ida nebe forti husi familia, no sosiedade sivil bele sai pilar ka base ba hamenus insestu.

Serimonia nee, remata ho break ba lunch…PARABENS ba JSMP..Suksesu !