Iha loron-6 fulan-Abríl, Ministériu Justisa,hamutuk ho PNUD nia Programa Sistema Justisa,hala'o tiha kampaña ida iha Pante Makassar,Oekusse,konta ho prezensa hosi partisipante resin 150 ne'ebé mai hosi komunidade lokál,organizasaun sira ne'ebé haree ba sektór justisa no mós PNTL.Eventu ne'e hanesan biban ida atu lori justisa nia autór sira besik liu ba povu no fó hatene kona-ba saida maka sira-nia papel no atividade sira. Kampaña ne'e mós serve hanesan plataforma ida atu define relasaun no hametin sinerjia entre instituisaun justisa formál no mekanismu tesi-lia trandisionál.Adisionalmente,eventu ne'e tulun ona gabinete informasaun públika iha Ministériu Justisa atu produz no disemina konxiensializasaun lei no materia sira informasaun públika nian ba povu iha baze.

Iha eventu ne'e, ne'ebé hala'o iha Administradór Distritu nia gabinete, aprezensa hosi juíz ne'ebé aloka iha Oekusse, Dr. Constancio Basmerry, no Dr. João Dnun, advogadu privadu ida hosi FFSO - Fundasuan Fatuk Sinai Oekusse - ONG lokál ida ne'ebé desde tinan 2005 hetan apoiu hosi Fundasaun Azia.Sira na'in rua fó esplikasaun kona-ba sira-nia knaar no loke diskusaun ida ho partisipante sira kona-ba dalan oinsá atu hadi'ak liu tán sistema formál no maneira efisiente oinsá maka halo justisa bele besik liután ba povu iha baze.

"Sosializasaun lei sira maka hanesan prinsipíu báziku ida ne'ebé ita nu'udar autór justisa presiza kontribui basá ida-ne'e maka hanesan dalan ida atu asegura justisa sei bele to'o duni ba komunidade sira.Ita bele halo povu kompriende justisa la'o oinsá liuhosi fó esplikasaun kona-ba sistema no atu buat ne'e akontese media tenke sai hanesan jogadór ida prinsipál",dehan Dr.Basmerry iha ninia intervensaun.

Partispante sira husu pergunta no hamosu problema sira ne'ebé sira-nia área hasoru, hanesan falta apoiu ba vítima sira, forma sira atu haberan ofisiál PNTL iha sub-distritu no rezolusaun lailais ba problema haksesuk-malu tan rai.

"Atu bele garante asesu ba justisa, autór justisa nia prezensa iha distritu sira ne'e buat ida nesesária katak Defensória Públika presiza hela metin iha iha distritu, no karik posivel tenke halo vizita mós ba sub-distritu sira atu fó tulun ba povu ne'ebé labele la'o sai hosi sira-nia hela-fatin", katak Sr. Arnoldus Suni, saseluk ida hosi FFSO ne'ebé marka mós prezensa iha eventu ne'e.

Diresaun Nasionál Direitus Umanus no Sidadania hosi Ministériu Justisa, no PNUD nia Programa Sistema Justisa, konsege prepara tiha ona materia komunikasaun lubuk ida no fahe mós livru Lei-Inan versaun lian Tetun no Portugês - durante atividade ne'e la'o.

Kampaña to'o ba povu ne'e hanesan kampaña dahuluk ida hosi kampaña lubuk ida ne'ebé sei hala'o iha sub-distritu sira ne'ebé iha Oekusse, Suai, Baukau no Dili.

PNUD no Konsellu Koordenasaun Setór Justisa servisu hamutuk kleur ona liuhosi Programa Sistema Justisa atu dezenvolve autór nasionál sira hosi Tribunál, Prokuradória no Ministériu Justisa nian liuhosi Defensória Públiku, Servisu Prizaun no Sentru Formasaun Jurídika nia kapasidade.

PNUD nia Programa Sistema Justisa ne'e hetan apoiu hosi rai Austrália, Brazíl, Irlanda, Noruega, Portugál, España, Suésia, ONU nia Gabinete ba Komisáriu Aas ba Direitu Ema nian (G-KADE), PNUD nia Departamentu ba Prevensaun Krize no Rekuperasaun.

Em 07/04/2009