SEKRETÁRIU Estadu Terras Propriedade (SETP) iha loron kuarta 30 no loron Kinta 31 fulan-Janeiru 2013 hala’o reuniaun preparasaun implementasaun planu asaun anuál ba tinan 2013 iha Sub Distritu Maubara Distritu Liquisa ho Diretór distritu sira no Xefe Departementu Sira Terras Propriedade nian.

Reuniaun ba preparasaun implemntasaun ne’e SETP Jaime Xavier Lopes husu ba ninia diretór no ninia xefe departementu sira atu fó sira nia partisipasaun masimu, nune’e iha futuru mai bele implementa plnau ne’ebé maka sira rasik iha tiha ona ho diadi’ak.

Nia hateten, reuniaun refere hodi bele fó hanoin ba funsionáriu terras propriedade nian tomak, liu-liu diretór no Xefe Departementu sira atu bele ezekuta osan ne’ebé terras propriedade iha ho didi’ak.

“Bainhira ita hateten dehan orsamentu ba Terras Propriedade ne’e boot maibé ita la iha planu ida ne’e hanesan deit, tanba osan ne’e ita la ezekuta ho di’ak, bainhira ita iha planu ne’ebé di’ak osan ne’e ita sei bele ezekuta ho di’ak entaun komunidade ho públiku sira hateten ita bele halo servisu ho di’ak,” dehan Jaime.

Nia salienta mós uluk la iha hanoin Diresaun Terras Propriedade atu sai hanesan Sekretátiu Estadu, maibé ikus mai diresaun ne’e sai ba Sekretáriu Estadu, entaun nia orsamentu mós tau ketak, ho fiar ne’ebé V Governu fó ba Terras Propriedade labele halo monu ba rai, nune’e tenki fó ita nia apoiu masimu ba iha Governu ida ne’e.

Reuniaun ne’ebé hala’o durante loron rua iha Maubara ne’e hetan partisipasaun hosi Diretór Nasionál DNTPSC, Diretór DTPSC hosi distritu 13, Xefe Departamentu sira hosi DNTPSC inklui mós funsionáriu sira.

iha reuniaun ba loron dahuluk nian diretór no Xefe departementu sira prepara hodi aprezenta sira nia planu asaun anual ne’ebé sira prepara ona ba tinan 2013 nian no iha loron daruak ba enkontru ne’e sira idaidak hato’o sira nia orsamentu hira maka sira presiza hodi bele realiza planu sira ne’ebé maka sira trasa ona ba iha tinan 2013 nian. *