Reuniaun Jerál Avalisaun Servisu Terras Propriedade iha Aileu

SEKRTETÁRIU Estadu Terras Proprioridades (SETP) liu hosi Diresaun Nasionál Terras Proprioridades Servisu Kadatrais (DNTPSC) ho diretór Terras Propriedade Distritu 13 hala’o reuniaun jerál kona-ba avalisaun servisu durante tinan 2012, ho objetivu atu debate lala’ok servisu Diretór DTPSC no Xefe Departamentu sira hotu kona-ba progresu no dezafiu ne’ebé sira hasoru durante hala’o aktividade servisu iha tinan 2012.

Iha reuniaun jerál terras propriedade nian ne’ebé hala’o iha Distritu Aileu ne’ebé hahuu iha loron 9 fulan-Janeiru to’o loro 10 fulan-Janeiru 2013 ne’e Sekretáriu Estadu Jaime Xavier Lopes hatete, reniaune’e importante tebes, tanba hosi reniaun ne’e mak diretór sira bele hato’o sira nia relatóriu servisu ka atividade servisu nian durante tinan ida nia laran, nune’e bele aproveita mós hato’o sira nia planu asaun ba tinan 2013.

‘’Liu hosi reuniaun Jerál ne’e ita bele haree fali planu iha tinan 2012 planu ne’ebé mak sira ezekuta ona, no planu ne’ebé mak sira seidauk ezekuta ne’e tuir duni nia dalan ka lae, no iha reuniaun ne’e mós sira bele hato’o ona sira nia planu asaun tinan 2013, tuir orsamentu ne’ebé maka Parlamentu Nasionál sei ezekuta,’’ dehan Jaime.

Reuniaun Jerál ne’ebé hala’o durante loron rua ne’e, hanesan iha loron dahuluk diretore sira hosi distritu ho Xefe departementu sira hosi Terras Propriedade hato’o sira nia relatóriu anual nian, liu-liu kona-ba orsamentu ne’ebé maka sira ejekuta ona durante tinan ida nia laran.

Iha loron daruak ba reuniaun jerál ne’e nian deskuti liu kona-ba planu asaun diretór no xefe Departementu sira nian ba tinan 2013 hodi deskuti mós kona-ba uniformizasaun ba formatu relatóriu servisu hosi Distritu no mós Nasional sira nian no reuniaun ne’e rasik hetan partisipasaun masimu hosi funsionáriu tomak DNTPSC.

Iha Reuniaun Jerál ne’e Diretór Naionál DNTPSC Romão Guterres hatete, iha reuniaun refere konvida mós Gabinete Inspesaun Ministerio Justisa nian, tanba durante tinan ida nia laran ne’e sira mak halo inspesaun, ne’e duni sira presiza tebes sira nia prezensa hodi bele ko’alia ba diretór sira hotu kona-ba saida mak durante ne’e sira hetan hosi sira nia inspesaun ne’e.

Ho partisipasaun inspetór jerál Ministériu Justisa nian ne’e tuir Romão atu bele fo atensaun ba diretór sira hotu, atu labele halo tan buat ne’ebé maka inspesaun sira kaer toman ba hahalok sira ne’ebé maka la tuir ona regra sira ministeriu nian.