SEKRETÁRIU Estadu Terras Propriedade, Jaime Xavier Lopes, iha loron Sesta, 14 fulan-Dezembru 2012 liu-ba simbolikamente entrega sertifikadu rejistu rai nian ba komunidade sira iha distritu Oe-cusse.

Entrega sertifikadu ne’ebé hala’o iha sala reuniaun administrasaun Distritu Oe-cusse ne’e SETP esplika mós katak, objetivu hosi entrega sertifikadu ba komuidade sira iha distritu Oe-cusse ne’e hodi bele sai hanesan baze legál ida ba komunidade sira katak rai ne’ebé ekipa foti dadus sira ba halo ona levantamentu dadus no la hetan disputa, sira maka iha direitu tomak atu sai nain ba rai ne’ebé maka sira iha.

Iha seremonia entrega sertifikadu ne’ebé hetan partisipasaun hosi Xefe Gabinete, SETP, Diretór Nasionál Terras Propriedade no Servisu Kadastrais (DNTPSC), Komandate PNTL Distritu Oe-Cusse, Administradór Distritu Oe-Cusse, inklui mós autoridade lokál sira ne’e, SETP husu ba komunidade sira liu-liu ba komunidade sira ne’ebé hetan sertifikadu na’in ba rai atu labele fa’an rai arbiru.

Programa entrega surat tadak rejistu na’in ba rain ne’e hanesan programa kontinuasaun hosi progverrama IV Govenu Konstitusionál. Tanba lansamentu Entrega sertifikadu rejistu na’in ba rai ne’e hahú hala’o ona iha fulan-Dezembru 2011 tinan kotuk, dehan Jaime.

Iha Seremonia entrega Sertifikadu ba komunidade ne’ebé entrega simbolikamente ba komunidade nain 8 ne’e, Sekretáriu Estadu Terras Propriedade, Jaime Xavier Lopes hateten, programa fahe Sertifikadu ba komunidade sira sei kontinua, liu-liu sei fahe ba komunidade sira ne’ebé sira nia rai sukat ona no la hetan disputa.

Nia mós hateten iha fulan hirak nia laran ne’e mós sei kontinua foti dadus ba area kolesaun ne’ebé maka iha, molok foti dadus sira ne’e, ba dahuluk sei kria enkontru komunitaria entre ekipa foti dadus ho lider komunitáriu sira.

Iha fatin hanesan Administradór Distritu Oe-Cusse mós husu ba komunidade sira ne’ebé hetan ona sertifikadu rejistu atu labele fa’an sira nia rai ba ema seluk.

Iha fatin hanesan komunidade sira mós husu ba Terras Propriedade atu kontinua halo levantamentu dadus ba fatin sira ne’ebé maka ekipa foti dadus sira seidauk tuun ba foti sira nia dadus atu bele foti dadus.

“Ami husu ba Terras Propriedade liu-liu ba tékniku sira atu bele tuun ba to’o fatin sira ne’ebé maka durante ne’e ekipa foti dadus sira seidauk ba foti, tanba ami mós hakarak ami nia rai sukat hotu hodi bele hetan sertifikadu hanesan sira seluk ne’ebé maka hetan ona,” Antonio da Costa Koa.*