DILI,MJ Sesta-Feira 16 Outubru 2026 Ministru Justisa, Dr. Sérgio de Jesus Fernandes da Costa Hornai, partisipa iha reuniaun trilaterál entre Cambodia, Filipina no Timor-Leste, liuhosi plataforma online, hodi diskute inisiativa no estratéjia atu halakon aplikasaun pena de morte.
Iha tinan 2025, Ministru Justisa hato’o pozisaaun iha Conferencia Mundial dos Ministros da Justica kona-bá Abolicao da Pena de Morte iha Roma, Itália katak Timor-Leste nu’udar membru plenu ASEAN nian. Iha proposta ne’e halo intrudusaun mós hanoin bo’ot ida ba iha Rejiaun ASEAN., tanba iha ona estadu membru tolu (3), hanesan Cambodia, Filipina no Timor-Leste maka proibidu aplikasaun pena de morte ne’e.

Haree ba inisiativa ne’e, Eis-Prezidente Filipina, Sra. Gloria Macapagal Arroyo, konvida ministru justisa hosi Cambodia, Filipina no Timor-Leste atu realiza reuniaun trilaterál hodi diskuti no aprofunda inisiativa ne’ebé hosi Timor-Leste.
Iha reuniaun Trilateral ne’e, hola-parte husi Vise-Ministru Justisa Cambodia, Sr. Malin Chin, Minsitru Justisa Filipina Sr. Frederick A. Vida, Ministru Justisa Timor-Leste, Sr. Sérgio de Jesus Fernandes da Costa Hornai, ho fasilitadór husi Sra. Glória Macapagal Arroyo, hodi hato'o polítika no legislasaun atuál husi kada estadu nian. Inklui diskuti planu asaun atu halo iha tempu tuir mai relativa ho halakon kastigu mate ne’e.

Iha diskusaun ne’e, parte tolu konkorda atu hametin advokasia, hasa’e sensibilizasaun informasaun no kampaña informasaun kona-bá halakon kastigu mate nomós atu hametin liu tan Kooperasaun entre estadu membru sira iha Rejiaun ASEAN.
Entre Estadu membru tolu (3) ne’e, rekuñese katak, iha difikuldade no obstákulu bo’ot, maibé kontinua iha esperansa katak iha loron ida mundu, espesialmente Rejaun ASEAN sei livre husi pena de morte no moris sei sai diak liu. Konkorda mós katak, atu hadia liu-tan polítika iha reinserção social hodi nune'e bele kontribui ba halakon pena de morte ne’e. Tanba iha fiar katak, so Maromak de’it mak termina ema ida nia vida. Reuniaun ida ne’e, inisia ba dahuluk no sei kontinua nafatin iha tempu sira tuir mai.