MANILA,MJ Sesta-Feira 09 Outubru 2026 Ministru Justisa, Dr. Sérgio de Jesus Fernandes da Costa Hornai, indika Diretór-Jerál Polítika Justisa (DGPJ), Dr. Nelinho Vital, ne'ebe lidera delegasaun Timor-Leste nian iha Diskusaun Daruak Grupu Traballu ASEAN kona-ba Tratadu ASEAN relasiona ho Transferénsia Pesoas Kondenadas, ne’ebé hala’o iha sidade Manila, Filipina.
Iha reuniaun realiza durante loron tolu, hahu hosi loron 07 to’o 09 fulan Outubru. Delegasaun Timor-Leste kompostu hosi reprezentante sira husi ekipa jurídika Ministériu Justisa, servisu prisionál, no Prokuradoria-Jerál Repúblika, ne’ebé hamutuk reprezenta instituisaun sira-ne’e iha atividade ida-ne’e.
Durante diskusaun, Timor-Leste aprezenta proposta rua kona-bá artigu Nebis In Idem no artigu kona-bá Língua trabalho ba prosesu transferénsia nian. inklui halo intervensaun ba kada artigu sira kona-ba pozisaun Timor-Leste relativa ho proposta Tratadu refere.

Timor-Leste hatudu nia kontribuisaun forte iha negosiasaun ida-ne’e, tanba Timor-Leste iha ona Tratadu kona-bá Transferénsia Pessoa Kondenadu CPLP nian no mós lei kona-bá kooperasaun judisial penal internasional. Instrumentu jurídiku rua ne’e, ajuda tebes delegasaun Timor-Leste nia pozisaun iha negosiasaun ida-ne’e no mos kontribuisaun bo’ot ba dezenvolvimentu Tratadu ida-ne’e.
Repúblika Demokrátika Timor-Leste ne’ebé sai Estadu Membro ASEAN ba dala-11 iha tinan 2025, kontinua ativu iha atividade ASEAN nian sira inklui ativa iha negosiasaun ba futuru Tratadu ASEAN nian.