DILI,MJ Quarta-Feira 07 Outubru 2026 Governu liuhosi Ministru Justisa no Primeiru-Ministru Ein-Ezersísiu, Dr. Sérgio de Jesus Fernandes da Costa Hornai, hamutuk ho Prezidente CAFI no Ministru Planeamentu no Investimentu Estratéjiku, Gastão Francisco de Sousa, realiza enkontru kona-bá Konsellu Administrasaun Fundu Infraestruturas (CAFI sigla portugés), iha Sala Sorumutuk, Edifísiu Ministériu Planeamentu no Investimentu Estratéjiku, Fatuhada, Díli.
Objetivu hosi enkontru ne’e mak atu aprezenta no diskute asuntu sira ne’ebé relasiona ho jestaun no funsionamentu Fundu Infraestruturas iha territóriu Timor-Leste, inklui progresu no ezekusaun projetu infraestruturas, dezafiu sira ne’ebé hasoru iha prosesu implementasaun, no medida sira ne’ebé presiza atu asegura jestaun Fundu Infraestruturas ne’ebé efetivu, transparente no efisiente, hodi apoia dezenvolvimentu infraestruturas nasionál.

Iha enkontru ne’e, Ministru Justisa hamutuk ho dirijente sira hosi Ministériu Justisa, liuhosi Diretór-Jerál Rejistu no Notariadu, Agustinho Vieira Gonçalves, hamutuk ho Diretór Nasionál Teknolojia Informasaun no Xefe Departamentu sira, halo aprezentasaun kona-ba dokumentu sira no pontu situasaun kona-ba progresu implementasaun Sistema Identidade Dijitál Únika.
Pedidu Apresentasaun Termu Referénsia Sistema Identidade Dijitál Únika (SIDU) dirijida ba Ministru Planeamentu no Investimentu Estratéjiku, nu’udar Prezidente Konsellu Administrasaun Fundu Infraestruturas (CAFI), hodi bele hetan apresiasaun no aprovasaun ba Termu Referénsia referida. Aprovasaun-ne’e permite hodi hahú implementa SIDU.