DILI,MJ Kuarta-Feira 02 Setembru 2026 Ministru Justisa, Dr. Sérgio de Jesus Fernandes da Costa Hornai, simu ofisialmente apoiu ekipamentu, inklui komputadór no seluk tan, hosi Embaixadór Repúblika Korea Súl iha Timor-Leste. Apoia ne’e destinada ba Polísia Sientífika Investigasaun Kriminál (PCIC).
Apoia kooperasaun ne’e ho objetivu hametin kapasidade institusionál no téknika PCIC no reforsa kooperasaun bilaterál entre Timor-Leste no Repúblika Korea Súl iha área justisa no investigasaun kriminál.
Ministru Justisa hato’o apresiasaun ba Governu no Povu Korea Súl, no subliña katak apoia ne’e importante tebes atu hadi’a kapasidade téknika no operasionál PCIC, liuliu rekolla, análize no prezervasaun evidénsia kriminál.
Eselénsia Ministru Justisa espera apoia ne’e atu kontribui ba modernizasaun PCIC no haforsa kapasidade iha prevensaun no kombate krime organizadu, transnasionál no krime kompleksu sira, hodi suporta sistema justisa no estadu direitu iha Timor-Leste.

Iha fatin hanesan, Embaixadór Repúblika Korea Súl hatudu kompromisu atu kontinua fó apoia ba fortalesimentu kapasidade institusionál iha Timor-Leste, liuhosi doasaun ekipamentu modernu, inklui komputadór no ekipamentu tékniku sira seluk ba Polísia Sientífika Investigasaun Kriminál (PCIC).
Iha serimónia ne’e, partisipa mós Diretor-Jerál Polítika Justisa, Diretor-Nasionál Polísia Sientífika Investigasaun Kriminál (PCIC), hamutuk ho funsionáriu sira hosi PCIC no Ministériu Justisa.