DILI,MJ Tersa-Feira 28 Jullu 2026 Ministru Justisa, Dr. Sérgio de Jesus Fernandes da Costa Hornai, konvoka no prezide Reuniaun Konsellu Konsultivu Esktraordináriu Ministériu Justisa iha Sala Reuniaun Ministériu Justisa, Kaikoli, Díli, hodi hametin planeamentu Orsamentu Tinan Fiskál 2027.
Reuniaun ne’e ninia objetivu mak avalia no harmoniza proposta planeamentu orsamentu Ministériu Justisa, atu asegura katak programa, atividade no prioridade estratéjika sira alinha ho objetivu dezenvolvimentu institusionál no prioridade Governu nian.
Durante reuniaun, Konsellu Konsultivu diskute preparasaun proposta orsamentu ne’ebé sei submete ba estimativa orsamentu futura, ho énfaze ba Programa Prioridade Governu (PPG), liuliu iha setor terras no propriedades.
Diskusaun sira ne’e, fó atensaun ba medida estratéjika atu hametin administrasaun terras no propriedades, promove seguransa jurídika ba direitu rai, no fasilita investimentu ho baze legal ne’ebé klaru, transparente no efisiente.

Ministériu Justisa reafirma nia kompromisu atu kontinua hametin koordenasaun interinstitusionál, boa governasaun, transparénsia no serteza jurídika, hodi garante implementasaun efetiva hosi programa no prioridade estratéjika ba Tinan Fiskál 2027.