DILI,MJ Segunda-Feira 16 de Marsu 2026 Sua-Eselénsia Ministru Justisa, Dr. Sérgio de Jesus Fernandes da Costa Hornai, hola-parte iha sesaun plenária iha Parlamentu Nasionál (PN) aprova ona projeitu lei Nº 9/VI (2ª) liuhosi votasaun finál globál, kona-bá Regulamenta prosesu adosaun no prosede Alterasaun Dahuluk ba Kódigu Sivil, Lei nú 10/2011, loron 14 fulan Setembru.
Deputadu sira ne’ebé prezide hosi Prezidente PN, Maria Fernanda Lay, aprova ho Unanimidade PJL Regulamenta Prosesu Adosaun iha Final Global ho votus a favor 57, kontra 0, no abstensaun 0.

Iha faze finál globál ne’e marka etapa importante iha prosesu lejislasaun, tanba parlamentár sira diskute ona projetu lei ne’e iha faze jeneralidade no espesialidade antes atu halo votasaun final.
Tuir prosedimentu parlamentar, hafoin aprovasaun iha faze finál globál, mesa PN sei prepara redasaun finál hodi depois submete ba Prezidente Repúblika, Dr. José Manuel Ramos-Horta ne’ebé iha kompeténsia konstitusionál atu promulga ka veta diploma legal ne’e.
Projetu lei refere konsidera importante atu reforsa enquadramentu legal iha área relevante ne’ebé regula husi diploma ne’e, nune’e kontribui ba dezenvolvimentu institusionál no konsolidasaun Estadu de Direitu Demokrátiku iha Timor-Leste.
Governu liuhosi ministériu kompetente no instituisaun relevante sira mós partisipa iha prosesu diskusaun iha komisaun parlamentár sira, hodi asegura katak kontiudu lei ne’e responde ba nesesidade legal no institusionál iha nasaun.

Iha sesaun plenária ne'e, akompañia hosi Sua-Eselénsia Vice-Ministru Asuntu Parlamentar, Adérito Hugo da Costa, Sua-Eselénsia Ministra Solidariedade Sosial no Inkluzaun, Verónica das Dores no Defensor Públika Jeral Dr. Câncio Ximenes, Diretór Jeral Politika Justisa, Dr. Nelinho Vital.