TOQUIO,MJ Kinta-Feira 05 de Marsu 2026 Governu Repúblika Demokrátika Timor-Leste, liuhosi Sua-Eselénsia Ministru Justisa, Dr. Sérgio de Jesus Fernandes da Costa Hornai, no Governu Japão, liuhosi Sua-Eselénsia Ministru Justisa Japão, Hiroshi Hiraguchi, asina ona Memorandum of Cooperation (MoC), iha Tóquio, Japão.
Asinatura ida-ne’e, etapa importante ida atu hametin relasaun koperasaun bilateral entre Timor-Leste no Japão, liuliu iha área justisa. Koperasaun ida-ne’e mós hakarak promove troka esperiénsia, koñesimentu tékniku no kapasidade institusionál entre instituisaun relevante sira iha nasaun rua.
Objetivu prinsipal hosi MoC ne’e, maka atu reforsa koperasaun iha dezenvolvimentu sistema justisa, kapasidade rekursu umanu, no partilha prátika di’ak sira ne’ebé bele kontribui ba fortalese governasaun no estadu direitu iha Timor-Leste no Japão.

“Ha’u nia kolega, Ministru Justisa Japaun, ami asina ona dokumentu ofisiál ida-ne’e hanesan pasu estratéjiku atu hasa’e visibilidade kooperasaun entre nasaun rua, no mós atu hakat ba oin liu tan iha prosesu konsolidasaun Estadu de Direitu Demokrátiku liu-liu administrasaun justisa ida ne’ebé forte no kredível, tuir interese komún Timor-Leste no Japaun” Ministru Justisa hateten liuhosi ninia diskursu hafoin asina akodu MoC ne’e.
Setor Justisa iha Timor-Leste no Governu Japaun, akordu kooperasaun ne’ebé realiza ohin loron, sai hanesan prova ida katak Timor-Leste no Japaun iha komitmentu ida ne’ebé forte hodi hametin no konsolida Estadu de Direitu Demokrátiku iha nasaun rua ne’e.

Kooperasaun ida-ne’e, reflete vontade hamutuk atu promove sistema justisa ida ne’ebé forte no efisiente, la’ós de’it ba interese bilateral, maibé mós ba estabilidade no dezenvolvimentu iha rejiaun ASEAN. IX Governu Konstitusionál, liuhosi Ministru Justisa Timor-Leste, hakarak hato’o momentu ida-ne’e signifikadu boot tebes.
Ministru Justisa hakarak hato’o agradesimentu bo'ot ba ICD no Ministériu Justisa Japaun ne’ebé desde tinan 2009 halo ona kooperasaun ida ne’ebé metin ho Timor-Leste. Fó kontribuisaun importante ba konsolidasaun rekursu umanu iha setor justisa, no mós ba fortalese instituisaun sira ne’ebé iha kredibilidade atu asegura no garante direitu fundamentál sidadaun sira nian, liuliu asesu justu no igual ba justisa.

Iha serimónia ne’e, Sua-Eselénsia Ministru Justisa, Dr. Sérgio Hornai, akompaña hosi Sua-Eselénsia Embaixadora Estraordinária no Plenipotensiária Repúblika Demokrátika Timor-Leste iha Japão, Maria Terezinha da Silva Viegas, no mós delegasaun ofisiál hosi Ministériu Justisa Timor-Leste.