TOQUIO,MJ Tersa-Feira 03 de Marsu 2026 Sua-Eselénsia Ministru Justisa, Dr. Sérgio de Jesus Fernandes da Costa Hornai, realiza enkontru kortezia ho Diretór adjuntu hosi Japan International Cooperation Agency (JICA), iha Tóquio, Japaun. Ministru Justisa desididu simu konvite hosi Ministru Justisa Japaun nian hodi mai iha Tóquio, ho misaun hodi hametin kooperasaun ba dezenvolvimentu setor Justisa hodi bele responde ba Timor-Leste nia Adezaun ba ASEAN.
Objetivu prinsipál kortezia vizita ne'e atu hametin tan lasus kooperasaun no garante apoiu indispensável, apoiu ne'ebé la kotu, maihosi Governu Japaun liuhosi organizasaun internasionál sira hanesan JICA ba Timor-Leste, hafoin Timor-Leste restaura nia independénsia.
Ministru Justisa afirma, hametin instituisaun públiku estadu ninian sai forte liu iha setor justisa, ho vizaun hodi lori konfiansa no serteza ba:
a) Sidadaun Timor-oan sira rasik;
b) Ajénsia internasionál sira;
c) Sidadaun estranjeiru ne'ebé hakarak rezide ka hela iha terítóriu nasionál Timor-Leste.
Ministériu Justisa Timor-Leste servisu hamutuk ho Ministériu Justisa Japaun liuhosi ICD (International Cooperation Department), ne'ebé apoia metin no reforsa iha área sira tuir mai:
a) Justisa no rekursu umanu iha setor justisa;
b) Dezenvolvimentu instituisionál;
c) Formasaun profisionál no Infra-estrutura ba setor justisa iha Timor-Leste.

Governu Timor-Leste hamutuk ho Embaixadora Estraordinária no Plenipotenciária RDTL iha Japão, Sua Eselénsia Maria Terezinha da Silva Viegas, hakarak lori konfiansa Justisa ba sidadaun sira — tantu nasionál no internasionál — hodi hela iha Timor-Leste ho livre. Tanba ne'e sistema justisa Timor-Leste nian sai instituisaun ne'ebé fó konfiansa, loloos, no efikás — ba benefísiu komunidade tomak, inklui sidadaun estranjeiru ne'ebé hakarak investe ka rezide iha nasaun ida-ne'e.