TOQUIO,MJ Tersa-Feira 03 de Marsu 2026 Sua-Eselénsia Ministru Justisa, Dr. Sérgio de Jesus Fernandes da Costa Hornai, hala’o enkontru kortezia ho Prezidente Federasaun Advogadu Japaun, nu’udar parte husi vizita ofisiál ne’ebé realiza iha Japaun.
Objetivu hosi enkontru kortezia ne’e mak atu aprezenta, iha tempu badak, lei kona-ba Ordem Advogadu Timor-Leste. Enkontru ne’e mos sai hanesan oportunidade importante ida atu troka esperiénsia entre parte rua, no esplora oportunidade kooperasaun entre asosiasaun advogadu husi nasaun rua iha futuru.

Aleinde ne’e, konsidera katak Timor-Leste no Japaun sai ona nu’udar Estadu Membro ba WTO (OMK – Organizasaun Mundiál Komérsiu), kooperasaun iha área jurídika konsidera importante atu prepara mekanizmu no kapasidade hodi responde ba disputa komersiál sira ne’ebé bele mosu iha futuru.
Iha ne’e enkontru ne’e, fó oportunidade ba parte rua atu troka hanoin kona-ba dezenvolvimentu sistema justisa, fortalese kooperasaun institusionál no promove relasaun amizade entre komunidade jurídika Timor-Leste no Japaun.