DILI,MJ Kinta-Feira 19 de Fevereiro 2026 Sua Eselénsia Ministru Justisa, Dr. Sérgio de Jesus Fernandes da Costa Hornai,hamutuk Prezidente Komisaun F,ne’ebé trata kona-bá asuntu Saúde, Seguransa Sosial no Igualdade Jéneru, Deputada Maria Borumali Barreto realiza diskusaun no votasaun iha faze espesialidade ba Proposta Lei No 9/VI (2a) ne'ebé regula prosesu adopsaun nasional no internasional no halo alterasaun dahuluk ba Kódigu Sivil (Lei Nº 10/2011, 14 Setembru), iha sala sorumutu Ministériu Justisa, Kolmera, Díli.
Governu liuhosi Ministru Justisa no Vise-Ministra Solidariedade Sosial no Inkluzaun, Céu Brites, akompaña deputadu sira atu analiza ho detallu artigu ida-idak hosi projetu lei ida-ne’e hatudu klarifikasaun teknika no responde ba preokuapasaun sira hosi deputadu sira, atu garante koerénsia entre prinsípiu protesaun labarik, transparénsia prosedimentu administrasaun no judisial .

Deputadu sira husi komisaun ne'e, hala'o diskusaun no votasaun ba artigu ida-idak iha faze espesialidade ba proposta lei ne'ebé atu regula prosesu adopsaun no altera Kódigu Sivil atual.
Nune’e, mós Komisaun F simu perspetiva husi partisipante sira hosi institusaun governu hanesan Adjuntu Prokuradór Jerál Repúblika, Adjunta Defensoria Públika, Polísia Sientífika Investigasaun Kriminal (PSIK); hosi parte igreja: Conferensia Episcopal Timor (CET); hosi sosiedade sivil: Asisténsia Legál ba Feto no Labarik (ALFeLa), Justice System Monitoring Program (JSMP), UNICEF, no seluk tan.

Purtantu, governu hamutuk ho Komisaun F hosi Parlamentu Nasionál no sosiedade sivil, sei kontinua iha sesta-feira (aban), hodi hala’o diskusaun no prosedimentu votasaun kona-bá artigu balun ne’ebé sidauk aprova no diskute iha proposta referida.