DILI,MJ Tersa-Feira 17 de Fevereiro 2026 Sua Eselénsia Ministru Justisa, Dr. Sérgio de Jesus Fernandes da Costa Hornai, realiza enkontru ofisiál ho reprezentante Ministériu Justisa Japaun nian no country director ba Ajénsia Kooperasaun Internasionál Japaun (JICA, sigla Inglés) Timor-Leste iha sala sorumutuk Ministru Justisa nian, edifísiu Ministériu Justisa, Kolmera, Díli.
Objetivu husi enkontru ne’e atu, fortalese kooperasaun bilateral entre Ministériu Justisa Timor-Leste ho Ministériu Justisa Japaun iha área reforma no modernizasaun setór justisa; Reforsa kapasidade rekursus umanus, liuhusi programa formasaun no treinamentu tékniku ba funsionáriu sira no profisionál sira iha sistema justisa; Promove partilha esperiénsia no asisténsia tékniku, hodi implementa prátika di’ak sira husi Japaun ne’ebé bele adapta ba realidade Timor-Leste nian; Aselera modernizasaun sistema administrasaun no servisu públiku, ho orientasaun ba transparénsia, efisiénsia no responsabilidade.

Hodi konkretiza objetivu stratejiku ne’e no fortalese relasaun bilateral, maka iha inisiu fulan Marsu 2026, sei asina Memorandu ba Kooperasaun entre parte rua, ne’ebé impulsiona kolaborasaun efetivu iha área sira ne’ebé relevánte ba interese komún sira.
Ministru Justisa, Dr. Sérgio Hornai hateten, kooperasaun ho parseiru internasionál sira hanesan JICA no Ministériu Justisa Japaun ne’e importante tebes hodi suporta prosesu reforma no konsolidasaun sistema justisa iha Timor-Leste. Governu kontinua loke odamatan ba kolaborasaun estratéjika ne’ebé bele kontribui ba dezenvolvimentu sustentável no fortalese Estadu Direitu nian.

Ministériu Justisa Japaun, ne’ebé representa husi Diretór Diresaun Kooperasaun Internacional (sigla Englesh ICD) Japaun reafirma ninia kompromisu atu kontinua fó apoiu ba inisiativa sira Ministériu Justisa nian, liuhusi programa formasaun, asisténsia tékniku, no partilha esperiénsia husi Japaun, atu nune’e bele hasa’e kapasidade institusionál no profesionalizmu iha setór justisa, liu-liu iha parte terras no prioridades.
Iha enkontru ne’e, Sua-Eselénsia Ministru Justisa, Dr. Sérgio Hornai, akompaña hosi Diretór Jerál Polítika Justisa, Nelinho Vital, no Xefe Gabinete Ministru Justisa, Albertina da Kruz Santa.