DILI,MJ Segunda-Feira 19 de janeiru 2026 Sua-Eselénsia Ministru Justisa, Dr. Sérgio de Jesus Fernandes da Costa Hornai ofisiálmente prezide reuniaun Konsellu Konsultivu dahuluk iha tinan 2026 ne’ebé realiza iha sala Ministériu Justisa, Kolmera, Díli.
Iha reuniaun konsellu konsultivu dahuluk-ne’e, diskute no identifika ezekusaun Orsamentu Geral Estadu (OGE) tinan 2026, hodi implementa servisu prioridáde sira ne’ebé aprezenta hosi Ministériu Justisa. Ho objetivu hodi garante funsionamentu institusionál ne’ebé efetivu, efisiente, transparante no tuir planu no orientasaun IX Governu Konstitusionál.

Ministru Justisa hateten reuniaun-ne’e, kada diresaun ida-idak atu avalia no konsolida kona-ba planu servisu ne’ebé dirijente no funsionáriu sira identifika ona durante fulan Janeiru ne’e. Tanba iha primeiru trimestre tinan ida-ne’e.
Ministériu Justisa sei fó kontinuidade ba programa no atividade sira ne’ebé seidauk responde ho di’ak, no simultaneamente sei define programa prioridáde sira ba tinan fiskál 2026, atu garante kontinuidade, efetividade no sustentabilidade politika no servisu institusionál.

Ministru Justisa konsidera katak, dirijente hotu tenke hametin planeamentu estratéjiku, hasa’e desempenhu institusionál, no garante katak programa no atividade sira iha Ministériu Justisa sei hala’o ho di’ak iha tinan fiskál 2026.
Iha reuniaun ne’e, partisipa ofisiál hosi Diretór Nasionál Polísia Sientífika Investigasaun Kriminál (PSIK), Diretór Jerál Públiku, Diretór Nasionál Sentru Formasaun Jurídiku Judisiária, Diretór Jerál Terras no Propriedades, Diretór Jerál Rejistu no Notariadu, Xefe Gabinete Ministru Justisa, Xefe Gabinete Vise-Ministru ba Fortalesimentu Institusionál, Xefe Gabinete Sekretáriu Estadu ba Terras no Propriedades, hamutuk ho Diretór Nasionál sira no Xefe Departamentu sira hosi kada diresaun iha Ministériu Justisa.