DILI,MJ-Segunda-Feira 06 Outubru 2025 Sua-Eselénsia Ministru Justisa, Dr. Sérgio de Jesus Fernandes da Costa Hornai hamutuk ho Sua-Eselénsia Ministra Solidariedade Sosial no Inkluzaun, Verónica das Dores hala’o abertura formasaun komplementár kona-ba "Lei Protesaun ba Labarik no Jovens iha Perigu" ne’ebé realiza iha Sentru Formasaun Juridiku no Judisiál (CFJJ sigla portugés), Cai-Coli, Díli.
Nune’e mós, Sua Eselénsia Prezidente Tribunál Rekursu, Dr. Afonso Carmona, Adjuntu Prokurador Jerál Repúblika, no Defensor Públiku Jerál hamutuk ho ekipa, entidade sira representativu hosi instituisaun estadu ninian.
Objetivu prinsipál hosi abertura ida-ne’e, atu promove partisipasaun no kompreensaun ba pratikante sira, liu-liu profissionál sira hanesan autoridade judisiál, advogadu no defensor públiku, hamutuk ho representante hosi ministériu relevante sira. Formasaun ne’e, tenke fó oportunidade atu aprofunda entendimentu kona-ba importánsia lei n.º 6/2023, ne’ebé estabese rejime jurídiku kona-ba protesaun ba labarik no jovens husi situasaun perigu.

Maioria hosi labarik sira iha rai laran entre idade 0 to’o tinan 5, hetan hela apoio kontínu hosi UNICEF hodi garante rejistu nasimentu iha nível nasional. Nune’e mós dadus sira ne’ebé ita rasik kompiladu hatudu katak, labarik sira entre idade 5 to’o 12 tinan, espesiálmente iha area rural, kontínua enfrenta desafiu iha asesu ba servisu rejistu ninian.