DILI,MJ-Sesta-Feira 19 Setembro 2025 Governu, liuhosi Sua-Eselénsia Ministru Justisa, Dr. Sérgio de Jesus Fernandes da Costa Hornai, hamutuk ho Sua-Eselénsia Sekretária Estadu Igualdade, Elvina de Sousa Carvalho, hala’o desiminasaun kona-ba tema “Papel Defensor iha Asesu ba Justisa iha Timor-Leste”, ne’ebé realiza iha edifísiu Ministériu Justisa, Colmera, Díli.
Iha semináriu desiminasaun ne’e, abertura ofisiál hala’o husi Sua-Eselénsia Ministru Justisa, Dr. Sérgio de Jesus Fernandes da Costa Hornai, hamutuk ho Sua-Eselénsia Sekretária Estadu ba Igualdade, Elvina de Sousa Carvalho, Defensór Públiku Jerál, Dr. Câncio Xavier, no Prezidente Orgaun Administrasaun AJHL-TL, Zefreus Lanicus Santos Ricardo.

“Ha’u hamutuk ho Sekretária Estadu Igualdade, reprezenta IX Governu Konstitusionál fó parabéns ba ita bo’ot sira hotu. Dalan ida-ne’e, sei naruk, maibé presiza fó importansia ba kada servisu ida-idak; tanba-ne’e, tenke diresiona hanoin ida de’it hodi hametin justisa iha Timor-Leste” Ministru Justisa hateten liuhosi diskursu ba estudante sira molok abertura formasaun ne’e.
Matéria dahuluk, responsavél husi Dra. Olga Barreto Nunes, no moderadór husi Vitálio de Jesus, kona-ba tema “Asesu ba Justisa iha Timor-Leste no Asisténsia Judisiál Integral Gratuita ba Prevensaun Violénsia Bazeada ba Jéneru”.
Matéria daruak, aprezenta husi Dr. Rodrigo Esteves Rezende, no moderador husi Vitálio de Jesus, kona-ba tema “Papel Defensoria Públika”. Matéria terseiru, responsavél husi Dr. Roberto Pereira Del Grossi, no moderadór husi Vitálio de Jesus, kona-ba tema “Defensoria Públika no Tutela Koletiva ba Direitu Difusu sira nian”

Matéria kuartu, responsavél husi Dra. Viviane Ceolin Dalasta Del Grossi, no moderadór husi Vitálio de Jesus, kona-ba tema “Defensoria Públika ba Prestasaun Direitu Humanu no Sistema Prizional”
Matéria kintu, aprezente husi Dra. Márcia Maria Filipe Sarmento, no moderadór husi Vitálio de Jesus, kona-ba tema “Protesaun ba Direitu Labarik sira iha Área Sivil, Kriminál no Prosesu Administrativu”