DILI,MJ-Tersa-Feira 29 Julho 2025 Sua-Eselénsia Ministru Justisa, Dr. Sérgio de Jesus Fernandes da Costa Hornai, lidera diskusaun kona-bá programa prioridade sira iha Ministériu Justisa molok tama ba aprezentasaun iha diskusaun Komisaun Revizaun Orsamentál tinan fiskál 2026 ne’ebé organiza hosi Ministériu Finansas.

Iha diskusaun ne’e, partisipa másimu hosi Sua-Eselénsia Vise-Ministru Fortalesimentu Institusionál, Dr. Paulo Remédios, Sua-Eselénsia Sekretariu Estadu Teras no Propriedades, Eng. Jaime Xavier Lopes, hamutuk ho Xefe gabinete sira.
Objetivu hosi diskusaun ne’e, atu diskute programa no atividade prioridade sira, hodi tetu didi’ak atu husu osan adisional ba Ministeriu Finansas molok hakat ba defende diskusaun Komisaun Revizaun Orsamentál (KRO) tinan fiskál 2026 ninian.

Diretóra Jerál Administrasaun no Finansas, Dra. Octávia Celesta de Sousa Soares aprezenta kona-bá programa prioridade sira iha Ministériu Justisa. Nune’e dirijente sira hotu atu tetu didi’ak iha liña Diresaun sira ne’ebé submete ona mai Diresaun Jeral Adminmistrasaun ninian esklui Defensoria Públika (DP) no Polísia Siéntifika Investigasaun Kriminál (PSIK).
Iha diskusaun ne’e, partisipa hosi Diretór Jerál sira, Diretór Nasional sira, Xefe departamentu sira. Nune’e mós Diretór Munisipál sira hosi Terra no Propriedade, Diretór Servisu Rejistu no Notariadu, Assessor Internasionál no Nasional sira no mós kuadru prinsipál sira, iha ámbitu Ministériu Justisa.